చంద్రబాబు నాయుడు ఫైర్: రక్త చరిత్రలో ఎన్టీఆర్ సీన్స్ పై దిగొచ్చిన వర్మ

హైదరాబాద్: రక్త చరిత్రలో ఎన్టీఆర్ పాత్ర చిత్రీకరణపై చెలరేగిన తీవ్ర ఆందోళనతో ఎట్టకేలకు చిత్ర దర్శకుడు రామ్ గోపాల్ వర్మ దిగొచ్చారు. చిత్రంలో ఎన్టీఆర్ ను కించపరిచే విధంగా ఉన్న దృశ్యాలను తొలగించడానికి అంగీకరించారు. చిత్రంలో ఎన్టీఆర్ ను అవమానపరిచే విధంగా ఉన్న దృశ్యాలను తొలగించాలని, తెలుగు ప్రజలకు క్షమాపణ చెప్పాలని తెలుగుదేశం పార్టీ అధ్యక్షుడు నారా చంద్రబాబు నాయుడు శుక్రవారం సాయంత్రం డిమాండ్ చేశారు. తెలుగు ప్రజల ఆత్మగౌరవాన్ని నిలబెట్టిన ఎన్టీఆర్ ను పిరికివాడిగా, విలన్ గా చూపించడం సరైంది కాదని ఆయన అన్నారు. దేశ రాజకీయాల్లోనే మార్పు తెచ్చిన నాయకుడు ఎన్టీఆర్ అని, ఎన్టీఆర్ వ్యక్తిత్వాన్ని కించపరిచే దృశ్యాలను తొలగించాల్సిందేనని ఆయన అన్నారు. తీవ్ర ఒత్తిడి రావడంతో చిత్రంలో ఎన్టీఆర్ ను అవమానపరిచే విధంగా ఉన్న దృశ్యాలను తొలగిస్తానని వర్మ ప్రకటించారు.

చిత్రంలోని బుక్కారెడ్డి ఓబుల్ రెడ్డి కాడని, శివాజీ రావు ఎన్టీఆర్ కాడని, తనకు ఓబుల్ రెడ్డి ఎవరో కూడా తెలియదని వర్మ బుకాయిస్తూ వచ్చాడు. వెంకటేశ్వర స్వామి సాక్షిగా చిత్ర కథ పూర్తిగా కల్పితమని చెప్పాడు. అయితే, తెలుగుదేశం శ్రేణుల నుంచి తీవ్ర వ్యతిరేకత రావడంతో వర్మ మెట్టు దిగారు. దృశ్యాలను తొలగించి సినిమా కంటిన్యుటీ దెబ్బ తినకుండా చూస్తామని వర్మ చెప్పారు. నిర్మాత సి. కళ్యాణ్ కూడా దిగొచ్చారు. క్రికెట్ ఆడుతూ ఔట్ అనే దృశ్యం, బాంబు దాడి దగ్గర వాయిస్ ఓవర్‌లో వచ్చే వ్యాఖ్యలు, ఆయుధాలన్నీ విడిచిపెట్టినప్పుడు ఉండే డైలాగ్‌లను తీసేస్తున్నామని కళ్యాణ్ చెప్పారు. మేం సినిమాలా చూశామని, శనివారం నుంచే వాటిని తొలగిస్తున్నామని చెప్పారు.