చిరంజీవి మెగా చిత్రం దర్శకుడు రామ్ గోపాల్ వర్మ?

హైదరాబాద్‌: రక్తచరిత్ర సినిమాతో సంచలనం సృష్టించిన రాంగోపాల్ వర్మ ప్రజారాజ్యం పార్టీ అధినేత చిరంజీవి 150వ చిత్రానికి దర్శకత్వం వహించే అవకాశాలున్నట్లు ప్రచారం జరుగుతోంది. ఈ చిత్రాన్ని చిరంజీవి అత్యంత ప్రతిష్టాత్మకంగా తీసుకుంటున్న విషయం తెలిసిందే. అందువల్ల కథ ఎంపిక విషయంలోనే కాకుండా దర్సకుడి ఎంపికలోనూ అత్యంత జాగ్రత్తగా వ్యవహరిస్తారనే స్పష్టం. అయితే చిరంజీవి చూడాలని వుంది చిత్రం చేసే సమయంలో వర్మ చిరును హీరోగా పెట్టి చిత్రాన్ని నిర్మిస్తానని ముందుకు వచ్చినట్లు సమాచారం. అయితే పలు కారణాల వల్ల ఆ చిత్రం చర్చల దాకా కూడా రాలేదు.

తాజాగా చిరంజీవితో చిత్రం చేయాలనే ప్రతిపాదనను వర్మ ముందుకు తెస్తున్నట్లు ప్రచారం జరుగుతోంది. తన వద్ద ఉన్న కథతోనే చిరంజీవి సినిమా తీయాలని అనుకుంటున్నట్లు గుసగుసలు వినిపిస్తున్నాయి. అయితే, అది కార్యరూపం దాలుస్తుందో, లేదో చెప్పలేం. సామాజిక ప్రయోజనాన్ని ఆశిస్తున్న చిరంజీవికి, అవేవీ పట్టవనే వర్మకు మధ్య సంధి కుదరడం అంత సులభం కాదు.