తెలంగాణపై మాట తప్పితే కోడి గుడ్లు, రాళ్లతో కొడ్తారు: విహెచ్

హైదరాబాద్‌: తెలంగాణపై మాట తప్పితే దండలు వేసిన ప్రజలే కోడిగుడ్లతో, రాళ్లతో కొడతారని కాంగ్రెసు తెలంగాణ ప్రాంత సీనియర్ నాయకుడు వి. హనుమంతరావు అన్నారు. తెలంగాణ రాష్ట్ర ఏర్పాటుకు తాము కట్టుబడి ఉన్నామని ఆయన శనివారం మీడియా ప్రతినిధులతో అన్నారు. తెలంగాణను అనుకూలంగా లేఖ ఇచ్చిన తర్వాత తెలుగుదేశం పార్టీ అధ్యక్షుడు నారా చంద్రబాబు నాయుడు తెలంగాణపై ఆందోళనలు చేపట్టాలని ఆయన సూచించారు. తెలంగాణ పట్ల చంద్రబాబు వైఖరిని ఆయన తప్పు పట్టారు.

ఎమ్మార్ ప్రాపర్టీస్ పై విచారణ జరిపించాల్సిందేనని ఆయన అన్నారు. ఎవడి సొమ్ము అని తెలంగాణ సంపదను దోచుకుంటారని ఆయన అడిగారు. 610 జీవో సమస్యను తెలంగాణ రాష్ట్ర సమితి (తెరాస) అధ్యక్షుడు కె చంద్రశేఖర రావు ముందుకు తేవడాన్ని ఆయన తప్పు పట్టారు. 610 జీవోను ముందుకు తేవడమంటే తెలంగాణ అంశాన్ని పక్కదోవ పట్టించడమేనని ఆయన అన్నారు.