విజయవాడ రోడ్డు ప్రమాదంలో ఆర్చరి కోచ్ లెనిన్ మృతి

విజయవాడ: విజయవాడకు చెందిన అంతర్జాతీయ ఆర్చరీ కోచ్‌ చెరుకూరి లెనిన్‌ కృష్ణా జిల్లా ఇబ్రహీంపట్నం జూపూడి వద్ద జరిగిన రోడ్డు ప్రమాదంలో మృతి చెందారు. కామన్‌వెల్త్ క్రీడల్లో కాంస్య పతకం సాధించిన రీఫిల్ చటర్జీకి లెనిన్ కోచ్‌గా వ్యవహరించారు. శనివారం రోజున ముఖ్యమంత్రి రోశయ్య, గవర్నర్ నరసింహన్ చేతుల మీదుగా సన్మానం జరిపించుకుని హైదరాబాద్ నుంచి విజయవాడ వెళుతుండగా జరిగిన రోడ్డు ప్రమాదంలో లెనిన్ ప్రాణాలు కోల్పోయారు. కారు నడుపుతున్న లెనిన్‌ ఎదురుగా వస్తున్న ఆటోను తప్పించబోయి డివైడర్‌ను ఢీకొట్టడంతో ఈ ప్రమాదం చోటుచేసుకుంది. ఈ ఘటనలో లెనిన్‌ అక్కడికక్కడే మరణించారు.

లెనిన్‌తోపాటు ఆయన తండ్రి సత్యనారాయణ, కామన్వెల్త్‌ రజిత పతక విజేత రీతుల్‌ ఛటర్జీ, స్నేహితుడు కళ్యాణ్‌ కూడా కారులో ఉన్నారు. కామన్వెల్త్‌లో రీతుల్‌ ఛటర్జీకి లెనిన్‌ వ్యక్తిగత శిక్షకునిగా వ్యవహరించారు. లెనిన్ మృతిపట్ల క్రీడల మంత్రి కోమటిరెడ్డి వెంకటరెడ్డి, ఎంపీ లగడపాటి రాజగోపాల్, ఎమ్యెల్యే మల్లాది విష్ణు దిగ్భ్రాంతిని వ్యక్తం చేశారు.