వైఎస్ పై కామెంట్ చేసిన వీహెచ్ వెంటనే క్షమాపణ చెప్పాలి: పద్మావతి

వరంగల్: మహబూబ్‌నగర్ తెలంగాణ అమరవీరుల సంస్మరణ సభలో కాంగ్రెస్ కార్యకర్తలను దూషించిన సీనియర్ నాయకుడు వి హన్మంతరావు వెంటనే క్షమాపణలు చెప్పాలని ఎమ్మెల్సీ పుల్లా పద్మావతి డిమాండ్ చేశారు. తెలంగాణవాదుల్లోనూ చాలామంది వైఎస్ రాజశేఖర్ రెడ్డికి అభిమానులు, వీరాభిమానులు ఉన్నారనే విషయం ఆయన తెలుసుకోవాలని సూచించారు. విహెచ్ ఎప్పుడు వైఎస్ రాజశేఖర్ రెడ్డిపై, ఆయన కొడుకు కడప పార్లమెంటు సభ్యుడు జగన్ పై వ్యాఖ్యానిస్తుంటారని దానిని ప్రజలు హర్షించరన్నారు.

కాగా వరంగల్ కాంగ్రెస్ పార్టీ కార్యాలయంలో కార్యకర్తలను దూషించాడంటూ అక్కడి కాంగ్రెస్ వారు వి హనుమంతరావు దిష్టిబొమ్మని కార్యాలయానికి తగిలించి వినూత్న నిరసన తెలిపింది. విహెచ్ మరోసారి ఇలాంటివి మాట్లాడితే సహించేది లేదని హెచ్చరించారు. వైఎస్ ను, జగన్ను విమర్శించటమే ధ్యేయంగా పెట్టుకున్నారని ఆరోపించారు.