రగులుతున్న రాష్ట్రావతరణ దినం నవంబర్ 1: విద్యార్థులు నిరాహార దీక్ష

హైదరాబాద్: నవంబర్ 1న ఆంధ్రప్రదేశ్ రాష్ట్ర అవతరణ దినోత్సవాన్ని ప్రభుత్వం తెలంగాణలోని పది జిల్లాల్లో రద్దు చేయాలని ఓయూ ఐకాస తలపెట్టిన సచివాలయ ముట్టడిని అడ్డుకొని విద్యార్థులను అరెస్టు చేయడాన్ని తెలంగాణ ఐకాస చైర్మన్ ప్రొఫెసర్ కోదండరాం, తెలంగాణ రాష్ట్ర సమితి అధ్యక్షుడు కె చంద్రశేఖర రావు, ఉస్మానియా ఐకాస నాయకుడు రాజారాం యాదవ్ ఖండించారు. విద్యార్థుల న్యాయపరమైన ఉద్యమం చేస్తుంటే పోలీసులు అరెస్టు చేయటం ఏమిటని వారు ప్రశ్నిస్తున్నారు.

ఓయు విద్యార్థులపై ప్రభుత్వం ద్వందనీతిని ప్రవర్తిస్తుందని కెసిఆర్ ధ్వజమెత్తారు. ఇంతకుముందు ఎన్నోసార్లు ఎన్నో పార్టీలు, ఎన్నో సంఘాలు సచివాలయాన్ని ముట్టడించాయన్నారు. వారిపై లేని కేసులు విద్యార్థులపై పెట్టడమేమిటన్నారు. విద్యార్థులపై పెట్టిన కేసులను వెంటనే ఎత్తివైయాలని డిమాండ్ చేశారు. తెలంగాణ విద్యార్థులనే పోలీసులు, ప్రభుత్వం జులుం చూపిస్తుందన్నారు. న్యాయంగా తెలంగాణ కోసం పోరాడుతున్న విద్యార్థులను పోలీసులు అరెస్టు చేయడం వెనుక ఆంధ్ర ఆధిపత్యం కనిపిస్తుందని ప్రొ.కోదండరాం అన్నారు. ప్రభుత్వం విద్యార్థులపై దుర్మర్గంగా ప్రవర్తిస్తుందని రాజారాం యాదవ్ అన్నారు. నవంబర్ 1కి నిరసనగా విద్యార్థులు ఆమరణ నిరాహార దీక్ష చేయనున్నట్లు చెప్పారు.

అంతకుముందు సచివాలయాన్ని విద్యార్థులు ముట్టడించారు. సచివాలయం మెయిన్ గేటు ఎక్కి సచివాలయంలోకి చొచ్చుకెళ్లడానికి ప్రయత్నించారు. అయితే పోలీసులు వారిని అడ్డుకొని అరెస్టు చేసి నాంపల్లి పోలీస్ స్టేషన్ కు తరలించారు. అయితే అక్కడ విద్యార్ధులు ఆమరణ నిరాహార దీక్షకు కూర్చున్నారు. నవంబర్ 1ను తెలంగాణ జిల్లాల్లో ప్రభుత్వం నిర్వహించతలపెట్టిన అవతరణ దినోత్సవాన్ని రద్దు చేసుకోవాల్సిందేనని డిమాండ్ చేశారు. అంతవరకు వెనక్కి తగ్గేది లేదన్నారు.