వైయస్ జగన్ దెబ్బ: రోడ్ల మీదికి వచ్చిన ఆనం బ్రదర్స్

నెల్లూరు: నెల్లూరు జిల్లాకు చెందిన ఆనం బ్రదర్స్ పై కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర ప్రభావం పడింది. మంత్రి ఆనం రామ నారాయణ రెడ్డి, శాసనసభ్యుడు ఆనం వివేకానంద రెడ్డి వైయస్ జగన్ ఓదార్పు యాత్రను వ్యతిరేకిస్తున్నారు. వైయస్ రాజశేఖర రెడ్డి విగ్రహాల ప్రతిష్టాపనకు కూడా వారు అడ్డుపడినట్లు జగన్ వర్గీయులు ఆరోపించారు. ఈ స్థితిలో వైయస్ జగన్ నెల్లూరులో ఓదార్పు యాత్ర చేపట్టారు. ఓదార్పు యాత్ర సందర్భంగా ఆనం బ్రదర్స్ పై ప్రజలు జగన్ కు ఫిర్యాదు చేశారు. రోడ్ల దుస్థితిపై వివరించారు. మంత్రి ఆనం రామనారాయణ రెడ్డి ఏం చేస్తున్నారు, ప్రజలను పట్టించుకోరా అని జగన్ అడిగారు.

జగన్ ఆ ప్రశ్న వేయడంతో బెంబేలెత్తిన ఆనం బ్రదర్స్ రోడ్ల మీదికి వచ్చారు. రోడ్ల దుస్థితిపై, రోడ్ల మీద చెత్త కుప్పలపై వారు అధికారులపై మండిపడ్డారు. వెంటనే పరిస్థితి చక్కదిద్దాలని వారు అధికారులను ఆదేశించారు. దీంతో వైయస్ జగన్ మళ్లీ నెల్లూరు రావాలని తెలుగుదేశం నాయకులు కూడా అంటున్నారు. మొత్తం మీద ఆనం బ్రదర్స్ కు వైయస్ జగన్ ఓదార్పు యాత్ర పెద్ద షాకే ఇచ్చిందని చెప్పాలి.