జగన్ పై వైయస్ అభిమానుల అగ్రహం: పోస్టర్లు, కటౌట్లు ధ్వంసం

నెల్లూరు: శ్రీ పొట్టి శ్రీరాములు నెల్లూరు జిల్లాలో దివంగత ముఖ్యమంత్రి వైయస్ రాజశేఖర్ రెడ్డి కుమారుడు, కడప పార్లమెంటు సభ్యుడు వైయస్ జగన్మోహన్ రెడ్డి అభిమానులు జగన్ పై ఆగ్రహం వ్యక్తం చేశారు. అయితే ఆ ఆగ్రహం ఆయన రాలేదనే ఆవేశంలో చేసింది. కాని అభిమానం లేక కాదు. జిల్లాలోని బుచ్చిరెడ్డిపాలెం మండలం పెనుగల్లు గ్రామంలో వైయస్ జగన్ అభిమానులు వైయస్ రాజశేఖర రెడ్డి విగ్రహాన్ని ఏర్పాటు చేశారు.

మంగళవారం జగన్ స్వయంగా వచ్చి ఆవిష్కరణ చేస్తారని అందరూ ఎదురు చూశారు. అందుకు అన్ని ఏర్పాట్లు చేశారు. జగన్ వస్తున్నట్టు కటౌట్లు, ఫ్లెక్సీలు కట్టారు. అయితే ఆయన రావటం లేదని తెలుసుకొని ఆవేశానికి లోనయ్యారు. వెంటనే స్వాగతం చెబుతున్నట్టు ఉన్న కటౌట్లను తొలగించారు. ఫ్లెక్సీలను చించివేశారు. అంతటితో ఆగకుండా స్థానికంగా ఉన్న కాంగ్రెసు నాయకులచే వైయస్ విగ్రహాన్ని ఆవిష్కరింప చేశారు.