వంద మందికి పైగా మహిళలను రేప్ చేసిన టాక్సీ డ్రైవర్

లండన్: మహిళలపై వరుసగా లైంగిక దాడులకు పాల్పడిన కేసుల్లో దోషిగా తేలిన లండన్ టాక్సీ డ్రైవర్ జాన్ వోర్ బాయ్స్ పై వందకు పైగా కేసులున్నాయని స్కాట్లాండ్ యార్డు చెప్పింది. వోర్ బాయ్స్ ను బ్లాక్ క్యాబ్ రేపిస్టుగా పిలుస్తారు. బ్రిటిష్ క్రిమినల్ చరిత్రలో లైంగిక నేరాల్లో పేరు మోసిన వ్యక్తి అతను. ఈ 53 ఏళ్ల టాక్సీ డ్రైవర్ కు 2009 ఏప్రిల్ లో నిరవధిక జైలు శిక్ష పడింది. 12 మంది మహిళలకు మత్తు మందులు ఇచ్చి లైంగిక దాడులకు పాల్పడిన కేసుల్లో అతనికి శిక్ష పడింది. అయితే అతను 102 మంది మహిళలపై ఆ విధమైన దాడులకు ఒడిగట్టినట్లు అనుమానిస్తున్నట్లు పోలీసులు చెప్పారు.

బాధితులు ఇంకా ఎక్కువ మందే ఉండి ఉంటారని, చాలా మంది మహిళలు తమపై అత్యాచారం జరిగిందనే విషయాన్ని కూడా గుర్తించి ఉండరని మెట్రోపాలిటన్ పోలీసు అధికారి అన్నట్లు బిబిసి తెలిపింది. రాత్రుళ్లు పొద్దుపోయిన తర్వాత మహిళలను పట్టుకుని వారికి మాయమాటలు చెప్పి మోసం చేసి లైంగిక దాడులకు పాల్పడేవాడని ప్రాసిక్యూటర్ అంటున్నారు.