కళ్లుపోయిన అభిమానిని ఆదుకోని మెగాస్టార్ చిరంజీవి

కడప: కడప జిల్లాకు చెందిన గుర్రప్ప అనే మెగా అభిమాని ప్రజారాజ్యం పార్టీ అధినేత చిరంజీవిపై అసంతృప్తితో ఉన్నాడని ఓ టీవీ ఛానల్ గురువారం ప్రసారం చేసింది. తాను చిరంజీవి అభిమానినైందుకు కుంగిపోతున్నాడు. బాగా గాయపడ్డ తనకు చిరంజీవి సహాయం చేస్తానని మాట ఇచ్చి ఇప్పటి వరకు చేయకపోవటంతో ఇక ఎవరికి చేస్తాడని ఆయన ప్రశ్నిస్తున్నాడు. మెగా అభిమానంతో ఆయన కళ్లు పొగొట్టుకున్నాడు. చిరంజీవి మాత్రం ఆయన్ను గాలికి వదిలేశాడు. కటిక దారిద్రంలో ఉన్న గుర్రప్పకు ఇచ్చిన హామీని కూడా చిరంజీవి నిలుపుకోలేక పోయాడు.

గుర్రప్ప చిన్నప్పటినుండి చిరంజీవికి పెద్ద అభిమాని. చిరంజీవి చిత్రం విడుదలకు ముందు, విడుదల రోజు గుర్రప్పది హడావుడే. చిరంజీవి నటించిన చిత్రం విడుదలకు ముందు ఆయన ప్రతి చిత్రానికి గుర్రప్ప కటౌట్లు కట్టాల్సిందే. తన పనులు మానుకొని మరీ కటౌట్లు కోసం థియేటర్ కు వెళ్లేవాడు. ఇక చిత్రం విడుదలయ్యే రోజు థియేటర్ కు వెళ్లి బాణాసంచా పేల్చి మొదటి ఆట చూసేవాడు. గుర్రప్ప చిరంజీవి ఇంద్ర చిత్రానికీ ఎప్పటి మాదిరే కటౌట్లు కట్టాడు. అయితే చిత్రం విడుదల రోజు బాణసంచా పేల్చుతుంటే ఆయన కళ్లలో పడి కళ్లు పోయాయి.

అయితే గుర్రప్ప చిరంజీవి తనకు తప్పకుండా సహాయం చేస్తాడని భావించాడు. ఓసారి చిరంజీవిని కలిసి తన పరిస్థితిని వివరించాడు. రోజు పని చేస్తేగాని గడవని పరిస్థితిని వివరించాడు. అది విని చిరంజీవి సహాయం చేస్తానని మాట ఇచ్చాడు. అయితే ఆ మాట రాజకీయ హామీగానే నిలిపిపోయింది. సహాయం చేస్తానన్న చిరంజీవి చుట్టూ చాలాసార్లు తిరిగాడు. అయితే అన్నిసార్లు తిరిగిగాక కానీ ఆయనకు అర్ధమైంది. చిరంజీవి తనకు సహాయం చేయడని. ప్రస్తుతానికి గుర్రప్ప భార్య కూలీ పని చేస్తు కుటుంబాన్ని పోషిస్తోంది. ఇప్పటికైనా చిరంజీవి సహాయం చేయాల్సిందిగా ఆయన ఆ ఛానల్లో కోరాడు. అందరి ముందుకు వచ్చాకనైనా చిరంజీవి సహాయం చేస్తాడని భావిద్దాం. గుర్రప్ప చిరు అభిమానులకు ఒక్కటే విజ్ఞప్తి చేస్తున్నాడు. మీరు అభిమానించండి. కాని అభిమానంతో జీవితాలు నాశనం చేసుకోకండి అని.