చిరంజీవికి మరో దెబ్బ: పార్టీకి గొట్టిముక్కల పద్మారావు రాజీనామా

హైదరాబాద్: ప్రజారాజ్యం పార్టీ అధ్యక్షుడు చిరంజీవికి మరో దెబ్బ తగిలింది. ప్రజారాజ్యం పార్టీ రాష్ట్ర కార్యదర్శి, కూకట్‌పల్లి నియోజకవర్గం ఇన్‌చార్జి గొట్టిముక్కల పద్మారావు తన పదవికి, పార్టీ ప్రాథమిక సభ్యత్వానికి బుధవారం రాజీనామా చేశారు. రాజీనామా లేఖను పార్టీ కార్యాలయంలో అందజేశారు. సామాజిక న్యాయం పేరుతో పీఆర్పీని స్థాపించిన చిరంజీవి డబ్బున్న వారికి టికెట్లు అమ్ముకుని, నమ్ముకుని పార్టీలోకి వచ్చిన తనలాంటి వారికి తీవ్ర అన్యాయం చేశారని ఆయన రాజీనామా అనంతరం మీడియా ప్రతినిధులతో అన్నారు.

వ్యవస్థలో మార్పు తీసుకువస్తానన్న చిరంజీవే రాజకీయ రంగం నుంచి సినిమా రంగంలోకి మారుతున్నారని ఆరోపించారు. ప్రజా సమస్యలపై చిత్తశుద్ధి లేకుండా ఏర్పాటు చేసే పార్టీలకు ఇదే పరిస్థితి ఎదురవుతుందని ఆయన అన్నారు. తెలంగాణ ప్రజల ఓట్లు దండుకోవడానికి సామాజిక తెలంగాణ అన్న చిరంజీవి తెలంగాణ ఏర్పాటుకు కేంద్రం సమ్మతించగానే ప్లేటు ఫిరాయించి, సమైక్యాంధ్ర నినాదం అందుకోవడం ఏ సిద్ధాంతం కిందకు వస్తుందని ఆయన ప్రశ్నించారు. గొట్టిముక్కల పద్మారావు త్వరలో తెలంగాణ రాష్ట్ర సమితి (తెరాస)లో చేరనున్నట్లు తెలుస్తోంది.