నేను ప్రేమోన్మాదిని కాను: రాజధానిలో పోస్టర్ల సంచలనం

హైదరాబాద్: రాజధాని హైదరాబాద్ నగరంలో నేను ప్రేమోన్మాదిని కాను అని ఓ అజ్ఞాత ప్రేమికుడి అంటించిన పోస్టర్లు సంచలనం రేకెత్తిస్తున్నాయి. ఉప్పల్ రింగ్ రోడ్డు, కుషాయిగూడ తదితర అన్ని బస్టాండులలో ఆ అజ్ఞాత ప్రేమికుడు పోస్టర్లు అంటించడంతో ప్రయాణీకులు ముఖ్యంగా కళాశాల విద్యార్థినీ విద్యార్థులు ఆ పోస్టర్లను చూస్తూ చర్చించుకుంటున్నారు. ఆ పోస్టర్లు అంటించటాన్ని పలు టీవీ ఛానళ్లు కూడా ప్రసారం చేస్తున్నాయి. ఆ అజ్ఞాత ప్రేమికుడి ఆవేదనను, ఆర్ధ్రతను ఆ టీవీ ఛానళ్లు బహిర్గతం చేస్తున్నాయి. తప్పు కేవలం అబ్బాయిలదేనా ఆ తప్పులో అమ్మాయిలది లేదా అని ప్రశ్నిస్తున్నాయి.

ఆ పోస్టర్లో పేరు రాయకుండానే, ఓ అమ్మాయి తన అక్కతో కలిసి వచ్చి ఆమెకు బ్లడ్ క్యాన్సర్ ఉంది అని చెప్పింది. తర్వాత ఆ అమ్మాయి తనను మోసం చేసి వెళ్లిపోయినట్టు ముద్రించాడు. ఆ పోస్టర్లో పైన తెలుగులో కింద ఇంగ్లీష్ లో కూడా ముద్రించాడు. పైన ఓ వైపు అబ్బాయిలు తప్పు చేస్తే ఎన్ కౌటంర్, మరోవైపు అమ్మాయి తప్పు చేస్తే... అంటూ ప్రశ్న వేశాడు. కొద్ది రోజుల్లో బయటకు వచ్చి ఆ అమ్మాయి మోసాన్ని బహిర్గతం చేస్తానని చెప్పాడు. ఈ పోస్టర్లు వెలువడటంతో అందరూ ఇప్పుడు తప్పు కేవలం అబ్బాయిలదే కాదని అమ్మాయిల వైపునుండి కూడా తప్పు ఉందని అనుకుంటున్నారు.