చంద్రబాబుకు తెలంగాణ నేతల ఢిల్లీ నేతల ఢిల్లీ యాత్ర కష్టాలు

హైదరాబాద్: తెలంగాణ రాష్ట్ర ఏర్పాటుకు పార్లమెంటు శీతాకాలం సమావేశాల్లో బిల్లు పెట్టాలని డిమాండ్ చేస్తూ పార్టీ తెలంగాణ నాయకులు చేపట్టిన ఢిల్లీ యాత్ర తెలుగుదేశం పార్టీ అధ్యక్షుడు నారా చంద్రబాబు నాయుడికి కొత్త తలనొప్పి తెచ్చి పెట్టింది. తెలంగాణలో క్యాడర్ ను కాపాడుకోవడానికి, ఇతర పార్టీలను ఇరకాటంలో పెట్టడానికి తెలంగాణ నేతల ఢిల్లీ యాత్రకు ప్లాన్ చేసిన చంద్రబాబుకు షాక్ తగిలింది. తెలుగుదేశం సీమాంధ్ర నాయకులు దాని ఫలితాన్ని అందకుండా చేస్తున్నారు. ఈ యాత్రతో తెలుగుదేశం నాయకుల్లో తీవ్ర విభేదాలు చోటు చేసుకున్నాయి. పార్టీ నాయకులు ప్రాంతాలవారీగా విడిపోయి విమర్శలు చేసుకుంటున్నారు. తెలంగాణ ఢిల్లీ నేతల యాత్రకు తమ పార్టీ అధ్యక్షుడు చంద్రబాబు అనుమతి లేదని సీమాంధ్ర నాయకుడు కోడెల శివప్రసాద రావు అన్నారు.

తెలంగాణపై ఆ ప్రాంత నాయకులు వ్యక్తం చేస్తున్నది వారి వ్యక్తిగతాభిప్రాయం మాత్రమేనని, అది పార్టీ అభిప్రాయం కాదని ఆయన స్పష్టం చేశారు. దీంతో తెలంగాణ నేతలు భగ్గుమన్నారు. చంద్రబాబు అనుమతితోనే తాము ఢిల్లీ యాత్ర చేపట్టామని చెప్పిన తెలంగాణ ప్రాంత నాయకుడు నాగం జనార్దన్ రెడ్డికి కోడెల శివప్రసాద రావు ప్రకటన విరుగుడుగా పనిచేసింది. దీంతో తెలంగాణ ప్రజల విశ్వాసాన్ని చూరగొనడానికి తలపెట్టిన ఢిల్లీ యాత్ర వ్యతిరేక ఫలితాలు ఇచ్చే పరిస్థితి ఏర్పడింది. దీంతో తెలుగుదేశం తెలంగాణ ప్రాంత నాయకుడు రేవంత్ రెడ్డి కోడెల శివప్రసాద రావుపై మండిపడ్డారు. తాము చంద్రబాబు అనుమతితోనే ఢిల్లీ యాత్ర చేపట్టామని, పార్టీ అనుమతి లేకుండా అంత పెద్ద కార్యక్రమం ఎలా చేపడుతామని ఆయన అన్నారు.

కాగా, తెలంగాణ రాష్ట్ర సమితి (తెరాస) పార్లమెంటు సభ్యురాలు రాములమ్మ చేసిన ప్రకటన తెలుగుదేశం పార్టీ తీరును బయటపెట్టేదిగా ఉంది. ఇప్పుడు తెలంగాణ నేతలను ఢిల్లీకి పంపిన చంద్రబాబు రేపు సీమాంధ్ర నాయకులను పంపుతారని, చంద్రబాబు డ్రామాలు ఆడుతున్నారని విజయశాంతి అన్నారు. ఈ విషయంలో రాములమ్మ ప్రకటనకే ఎక్కువ విశ్వసనీయత ఉంటుందనడంలో సందేహం లేదు.