మీడియా ముందు పోటీ పడుతున్న కెసిఆర్ ఫ్యామిలీ

హైదరాబాద్: నిత్యం మీడియాలో కనిపించకపోతే ప్రజలు ఎక్కడ మరిచిపోతారో అని తెలంగాణ రాష్ట్ర సమితి అధినేత కె చంద్రశేఖరరావుకు, ఆయన కుమారుడు, సిరిసిల్ల శాసన సభ్యుడు కె తారకరామారావు, తెలంగాణ జాగృతి అధ్యక్షురాలు కల్వకుంట్ల కవితలు భావిస్తున్నారని ఆరోగ్య శాఖ మంత్రి దానం నాగేందర్ శుక్రవారం విమర్శించారు. కెసిఆర్ కుటుంబంలో ఎవరికీ తెలంగాణపై చిత్తశుద్ధి లేదని ఆయన ఆరోపించారు. మీడియాలో వారి కుటుంబ సభ్యులు పోటీలు పడి మరి మాట్లాడుతున్నారన్నారు. కేవలం తెలంగాణ సెంటిమెంటును అడ్డుపెట్టుకొని వారు లాభం పొందలని చూస్తున్నారన్నారు. తెలంగాణ విషయంలో పెద్దలకు మాత్రమే చిత్తశుద్ధి ఉందన్నారు.

కాంగ్రెస్ సీనియర్ నాయకుడు గోనె ప్రకాశరావు ఎప్పుడు ఏం మాట్లాడుతారో ఆయనకే తెలియదన్నారు. ఆయన ప్రభుత్వాన్ని, పార్టీని విమర్శించే పద్ధతిని మానుకోవాలని సూచించారు. రోశయ్య ఆధ్వర్యంలో ప్రభుత్వం చాలా బాగా పని చేస్తుందన్నారు. ఇటీవల కాలంలో ప్రతీదానికి రాజీనామా చేయాలనటం ఫ్యాషన్ గా మారిందని ఎద్దేవా చేశారు.