వైయస్ జగన్ కోసమే కొండా సురేఖ రాజీనామా చేశారు: శంకరరావు

హైదరాబాద్‌: కడప పార్లమెంటు సభ్యుడు వైయస్ జగన్ కోసమే శాసనసభ్యురాలు కొండా సురేఖ మంత్రి పదవికి రాజీనామా చేశారని కాంగ్రెసు సీనియర్ శాసనసభ్యుడు పి. శంకరరావు అన్నారు. తనను ఎఐసిసి సదస్సుకు అహ్వానించకపోవడంపై కొండా సురేఖ కాంగ్రెసు అధ్యక్షురాలు సోనియా గాంధీకి లేఖ రాసిన విషయం తెలిసిందే. కొండా సురేఖ రాసిన ఈ లేఖపై శంకరరావు శనివారం మీడియా ప్రతినిధుల సమావేశంలో తీవ్రంగా ధ్వజమెత్తారు. పార్టీకి ఎవరు విధేయులు తేల్చుకోవడానికి తాను సిద్ధంగా ఉన్నానని ఆయన సురేఖకు సవాల్ విసిరారు.

ముఖ్యమంత్రిగా రోశయ్య అసమర్థుడని సురేఖ పలు మార్లు వ్యాఖ్యానించారని, ఆ విషయాన్ని సురేఖ మర్చిపోయారా అని ఆయన అన్నారు. అందుకే ఎఐసిసి ఆహ్వానితుల జాబితాలో కొండా సురేఖ పేరు లేదని ఆయన అన్నారు. తెలంగాణ గురించి కొండా సురేఖ ఈ మధ్యనే మాట్లాడుతున్నారని, తాను మొదటి నుంచి తెలంగాణవాదినే అని ఆయన అన్నారు.