తల్లి జైలుకెళితే కూతురు ఉద్యమకారులను జైలుకు పంపిస్తోంది: హరీష్

మెదక్: తెలంగాణ కాంగ్రెస్ మంత్రులు కొందరు పదవుల కోసం ముఖ్యమంత్రి రోశయ్య పంచన చేరారని తెలంగాణ రాష్ట్ర సమితి నాయకుడు, సిద్దిపేట శాసనసభ్యుడు హరీశ్ రావు విమర్శించారు. వారు పదవులు తప్ప తెలంగాణ ప్రజలతో సంబంధం లేదన్నట్లుగా వ్యవహరిస్తున్నారని అన్నారు. తెలంగాణ సాధన కోసం తెలంగాణ కాంగ్రెస్ నాయకుల్లో సఖ్యత లేదన్నారు. కొందరు కాంగ్రెస్ నాయకులు తెలంగాణ కోసం పాటుపడుతున్నా వారికి పార్టీలోని మిగతా వారి మద్దతు కొరవడిందన్నారు.

పర్యాటక శాఖమంత్రి గీతారెడ్డి పోలీసులతో తెలంగాణ వాదులపై లాఠీచార్జీ చేయిస్తోందని, తెలంగాణ కోసం పోరాటం చేస్తున్న వారిపై కేసులు పెట్టించి జైళ్లో వేస్తోందని ఆరోపించారు. ఆయితే గీతారెడ్డి తల్లి ఈశ్వరీబాయి తెలంగాణ కోసం పోరాడిన ధీర అని అన్నారు. ఈశ్వరీబాయి తెలంగాణ కోసం పోరాటంలో జైలుకు కూడా వెళ్లారని గుర్తు చేశారు. గీతారెడ్డి తన తల్లి ఆశయాలకు విరుద్ధంగా నడుచుకుంటున్నదని అన్నారు. ఈశ్వరీబాయి జైలుకు వెళితే గీతారెడ్డి జైలుకు పంపిస్తుందని అన్నారు.