గీతారెడ్డి ఇల్లు ముట్టడి, అరెస్టులు: తెలంగాణవ్యాప్తంగా నిరసనలు

హైదరాబాద్: రాష్ట్రావతరణ దినోత్సవాలను వ్యతిరేకిస్తూ తెలంగాణవ్యాప్తంగా సోమవారం ఉదయం నుంచే నిరసనలు ప్రారంభమయ్యాయి. తెలంగాణ అంతటా ప్రభుత్వ కార్యాలయాలపై ఆందోళనకారులు నల్లజెండాలు ఎగురవేస్తున్నారు. సోమవారం ఉదయం తెలంగాణ ఆందోళనకారులు సికింద్రాబాదులోని మంత్రి గీతారెడ్డి ఇంటిని ముట్టడించారు. తెలంగాణ రాష్ట్ర సమితి (తెరాస) శాసనసభ్యుడు హరీష్ రావుతో సహా తెలంగాణ అధికారులు గీతా రెడ్డి ఇంటి ముందు బైఠాయించారు. వారిని పోలీసులు అరెస్టు చేశారు. ఈ సందర్భంగా తీవ్ర ఉద్రిక్తత నెలకొంది.

హైదరాబాదులోని ఉస్మానియా విశ్వవిద్యాలయంలోని ఆర్ట్స్ కళాశాల భవనంపై విద్యార్థులు నల్లజెండాను ఆవిష్కరించారు. గోదావరి ఖనిలోని సింగరేణి బొగ్గు గనుల కార్యాలయంపై కూడా కార్మికులు నల్లజెండాను ఎగురవేశారు. రాష్ట్రావతరణ దినోత్సవాలను వ్యతిరేకిస్తూ ప్రజాఫ్రంట్ చైర్మన్ గద్దర్ జగ జీవన్ రామ్, అంబేడ్కర్ విగ్రహాల వద్ద తెలంగాణ అమరవీరులకు నివాళులు అర్పించారు. తెలంగాణ అంతటా విద్యాసంస్థలకు యాజమాన్యాలు స్వచ్ఛందంగా సెలవులు ప్రకటించాయి. తెలంగాణ అంతటా రాష్ట్రావతరణ దినోత్సవాలు వెలవెలబోతున్నాయి.