అనుష్కతో పాటు ప్రముఖుల ఇళ్లపై రాళ్ల దాడులు: అరెస్టు

హైదరాబాద్: సినీ నటి అనుష్కతో పాటు హైదరాబాదులోని జూబ్లీహిల్స్, బంజారాహిల్స్ ల్లోని ప్రముఖుల ఇళ్లపై మద్యం మత్తులో దాడులు చేస్తున్న 9 మంది విద్యార్థులను పోలీసులు అరెస్టు చేశారు. వారి వాహనాలను వేటాడి, పట్టుకున్నారు. రెండు కార్లను స్వాధీనం చేసుకున్నారు. ఈ తొమ్మిది మందిలో అమ్మాయిలు కూడా ఉన్నట్లు తెలుస్తోంది. కొంత మంది మైనర్లు కూడా ఉన్నట్లు సమాచారం. వారి నుంచి రెండు కార్లను కూడా స్వాధీనం చేసుకున్నారు. కార్లలో రాళ్లను, కోడిగుడ్లను కనిపెట్టారు. మరో కారులో మరికొంత మంది నిందితులు పారిపోయినట్లు తెలుస్తోంది. పట్టుబడినవారంతా సంపన్నులు, ముఖ్యుల పిల్లలని తెలుస్తోంది.

కొంత మంది ఆకతాయిలు గత నెల రోజులుగా ప్రముఖులు, సంపన్నులు నివసించే జూబ్లీహిల్స్, బంజారా హిల్స్ ల్లోని ప్రముఖుల ఇళ్లపై రాళ్లతో, కోడిగుడ్లతో దాడులు చేస్తున్నారు. ఈ విషయమై పోలీసులకు ఫిర్యాదులు కూడా అందాయి. దీంతో పోలీసులు గట్టి నిఘా ఏర్పాటు చేశారు. నిఘా సందర్భంగా నిందితులను గుర్తించి పట్టుకున్నారు. ఆ ప్రాంతాల్లో వెళ్లే ద్విచక్రవాహనదారులపై కూడా వారు దాడులు చేయడం పరిపాటిగా మారింది. ఆర్ధరాత్రి ఈ ఆకతాయిలు దాడులకు దిగుతున్నారు. తమ కార్ల నెంబర్ ప్లేట్లపై తెల్ల కాగితాలు అతికించుకుని వీరు దాడులకు పాల్పడుతున్నట్లు పోలీసులు గుర్తించారు.