మాకొద్దీ మైక్రో రుణాలు: చంద్రబాబుతో మైక్రో బాధితుల మొర

హైదరాబాద్: రాష్ట్రంలో 2 కోట్లమంది సూక్ష్మరుణ బాధితులు ఉన్నారని అయినా ప్రభుత్వం పట్టించుకోవటం లేదని తెలుగు దేశం పార్టీ అధ్యక్షుడు, మాజీ ముఖ్యమంత్రి చంద్రబాబునాయుడు ఆరోపించారు. సూక్ష్మరుణ బాధితులను పరామర్శించడానికి రంగారెడ్డి జిల్లాలో పర్యటిస్తున్న చంద్రబాబు గురువారం శామీర్ పేట వెళ్లారు. అక్కడి మహిళలు తమకు సూక్ష్మరుణ సంస్థలు లేకుండా చేయాలని చంద్రబాబును కోరారు. వాటి వల్ల తాము తీవ్ర ఇబ్బందులు ఎదుర్కొంటున్నట్టు వారు చెప్పారు. ప్రభుత్వంతో పోరాడి మహిళలకు పావలా వడ్డి ఇప్పించేలా చేస్తానని చంద్రబాబు హామీ ఇచ్చారు.

సూక్ష్మ బాధితుల కోసమే తెలుగు దేశం శనివారం నుండి ఆందోళనలు నిర్వహించనుందని చెప్పారు. తమకు ఫీజు రీయింబర్స్ మెంటులు కూడా అందడం లేదని కొందరు విద్యార్థులు చంద్రబాబుతో మొరపెట్టుకోగా ఆ విషయమై ప్రభుత్వంతో పోరాడుతానని చెప్పారు. ప్రజల సమస్యలు పరిష్కారం అయ్యేంత వరకు తెదేపా పోరాడుతుందన్నారు. ప్రభుత్వానికి అన్నివైపులనుండి ఆదాయం పెరిగినప్పటికీ ప్రజల సమస్యను మాత్రం పట్టించుకోవటం లేదన్నారు. అవినీతి పరులకు కొమ్ముకాయడానికే సమయం సరిపోతుందని ఎద్దేవా చేశారు.

కాగా అంతకుముందు శామీర్ పేటకు వస్తున్న చంద్రబాబునాయుడిని తెలంగాణ రాష్ట్ర సమితి కార్యకర్తలు అడ్డుకునే ప్రయత్నం చేశారు. అయితే తెలుగు దేశం పార్టీ కార్యకర్తలు, పోలీసులు వారిని నచ్చజెప్పే ప్రయత్నం చేశారు. అయినప్పటికీ వారు చంద్రబాబు కారుకు అడ్డుగా నిలబడి వెళ్లనీయక పోవటందో టీడీపీ, తెరాసల మధ్య వాగ్వాదం చోటు చేసుకుంది. అది కాస్త ముదిరి ఘర్షణకు దారి తీసింది. పోలీసులు తెరాస కార్యకర్తలను అదుపులోకి తీసుకున్నారు.