కెసిఆర్ నిరాహార దీక్షపై బండారం బయట పడుతుంది: నాగం జనార్దన్ రెడ్డి

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నిరాహార దీక్ష ఎలా సాగిందో అందరికీ తెలుసునని, చికిత్స గురించి వివరాలు వెల్లడిస్తే కెసిఆర్ బండారం బయటపడుతుందని తెలుగుదేశం తెలంగాణ ఫోరం కన్వీనర్ నాగం జనార్దన్ రెడ్డి అన్నారు. తమ పార్టీ అధ్యక్షుడు నారా చంద్రబాబు రంగారెడ్డి జిల్లా పర్యటనను అడ్డుకుంటున్న తీరుపై ఆయన గురువారం మీడియా ప్రతినిధుల సమావేశంలో కెసిఆర్ పై తీవ్ర విమర్శలు చేశారు. తెలంగాణపై కెసిఆర్ కు తగిన పరిజ్ఞానం లేదని, తమ వద్దకు వస్తే క్లాస్ తీసుకుంటామని ఆయన అన్నారు. తమ పార్టీ కార్యక్రమాలను తెరాస కార్యకర్తలు అడ్డుకుంటే సంభవించే పరిణామాలకు కెసిఆర్ బాధ్యత వహించాల్సి ఉంటుందని ఆయన అన్నారు. తమ పార్టీ బలహీనంగా లేదని ఆయన అన్నారు. కెసిఆర్ వ్యవహార శైలి వల్ల తెలంగాణకు నష్టం జరుగుతోందని ఆయన అన్నారు. డిసెంబర్ 23వ తేదీన విద్రోహ దినంగా పాటించి, ధర్నాలూ ఆందోళనలూ చేస్తామని ఆయన చెప్పారు.

కెసిఆర్ పై తెలుగుదేశం తెలంగాణ ప్రాంతానికి చెందిన మరో నేత కడియ శ్రీహరి కూడా తీవ్రంగా ధ్వజమెత్తారు. తెరాస, కాంగ్రెసు కమ్మక్కయి తెలుగుదేశం పార్టీని బలహీనపరిచే ప్రయత్నాలు చేస్తున్నాయని ఆయన విమర్శించారు. చంద్రబాబు తెలంగాణకు వ్యతిరేకమని చెప్పలేదని ఆయన స్పష్టం చేశారు. కెసిఆర్ ఇంగిత జ్ఞానం లేకుండా మాట్లాడుతున్నారని, సిగ్గు లేకుండా తెరాస కార్యకర్తలు దాడులు చేస్తున్నారని ఆయన వ్యాఖ్యానించారు. కాంగ్రెసువారిని కెసిఆర్ ఎప్పుడైనా నిలదీశారా అని ఆయన ప్రశ్నించారు. శ్రీకృష్ణ కమిటీ తెలంగాణకు అనుకూలంగా నివేదిక ఇస్తుందనే నమ్మకం లేదని ఆయన అన్నారు.