బెంగళూరు అంటే అమెరికా అధ్యక్షుడు బరాక్ ఒబామాకు భయమా?

న్యూఢిల్లీ: బెంగళూర్ పేరు చెప్తే అమెరికా అధ్యక్షుడు బరాక్ ఒబామా భయపడుతున్నారని ప్రచారం అంటున్నారు. ఆ భయం వల్లనే ఆయన బెంగళూర్ పర్యనకు రావడం లేదని అంటున్నారు. భారత పర్యటన సందర్భంగా ఆయన సందర్శించే నగరాల్లో బెంగళూర్ లేదు. దీంతో ఆ ప్రచారం ముమ్మరమైంది. బెంగళూర్ అంటే ఒబామా భయపడుతున్నారని కర్ణాటకకు చెందిన కేంద్ర మంత్రి వీరప్ప మొయిలీ కూడా అన్నారు. బెంగళూర్ ఐటిలో సాధించిన ప్రగతి వల్లనే ఒబామా భయపడుతున్నారని ఆయన అన్నారు. బుధవారం ఢిల్లీలో జరిగిన ఓ పుస్తకావిష్కరణ సభలో ఆయన ఈ వ్యాఖ్యలు చేశారు. ఐటిలో చైనా, బెంగళూర్ సాధించిన ప్రగతిని ఒబామా పలు మార్లు ప్రస్తావించిన విషయాన్ని ఆయన గుర్తు చేశారు.

తాను ముఖ్యమంత్రిగా ఉన్న కాలంలో అద్భుతమైన నైపుణ్యం గల ఉద్యోగుల సాయంతో ప్రపంచస్థాయి ఐటి మౌలిక రంగ వసతుల కల్పనకు కృషి చేసినట్లు ఆయన తెలిపారు. ఇప్పుడు కర్ణాటకలో యేటా 18 వేల కోట్ల రూపాయల విలువ చేసే సాఫ్ట్ వేర్ వాణిజ్యం జరుగుతోందని ఆయన చెప్పారు. ఇదంతా మంచి నైపుణ్యం గల ఉద్యోగుల మూలంగానే జరిగిందని, మనం ఒక్క ఆలోచనను ముందుంచితే దాన్ని వారు అమలు చేసి చూపుతారని ఆయన అన్నారు.