చంద్రబాబు తెలంగాణ వైఖరిపై తలలు పట్టుకుంటున్న నేతలు?

హైదరాబాద్: తెలంగాణ విషయంలో తమ పార్టీ అధ్యక్షుడు నారా చంద్రబాబు నాయుడు అనుసరిస్తున్న వైఖరికి తెలుగుదేశం పార్టీ నాయకులు తలలు పట్టుకుంటున్నట్లు తెలుస్తోంది. తెలంగాణ ప్రభావం అంతగా లేదని భావిస్తున్న హైదరాబాదు శివార్లలో కూడా చంద్రబాబు పర్యటనకు తెలంగాణ రాష్ట్ర సమితి (తెరాస) కార్యకర్తల నుంచి ఆటంకాలు ఏర్పడుతున్నాయి. ఆయన రంగారెడ్డి జిల్లా పర్యటన పేరుతో హైదరాబాదు శివార్లలో పర్యటిస్తున్నారు. నాగోల్, కూకట్ పల్లి, కుత్బుల్లాపూర్, బాలానగర్ ప్రాంతాల్లో చంద్రబాబును తెరాస కార్యకర్తలు అడ్డుకున్నారు. దానిపై చంద్రబాబు తీవ్రంగా మండిపడ్డారు. తెరాసకు అది తగదని ఆయన హెచ్చరించారు. తామేమిటో చూపిస్తామని కూడా ఆయన హెచ్చరించారు. తెరాస కార్యకర్తల తీరుకు తాను భయపడబోనని చెప్పారు. అయినా, ఆయనకు ఆటంకాలు తప్పడం లేదు.

తమ పార్టీని తెలంగాణలో లేకుండా చేయాలని తెరాస అధ్యక్షుడు కెసిఆర్ ప్రయత్నిస్తున్నారని చంద్రబాబు చాలా కాలంగా ధ్వజమెత్తుతున్నారు. అయితే, అసలు కారణం అది కాదని అంటున్నారు. తెలంగాణ విషయంపై చంద్రబాబు సీమాంధ్ర, తెలంగాణ ప్రాంతాలకు చెందిన నాయకులను రెచ్చగొట్టారని, ఏ ప్రాంతానికి చెందినవారు ఆ ప్రాంతానికి చెందిన గొంతు వినిపించాలని, తన పని తాను చేసుకుంటూ పోతానని చంద్రబాబు చెప్పారని అంటున్నారు. ఏ వైఖరి స్పష్టం చేయకుండా చంద్రబాబు వ్యవహరిస్తున్న తీరు తెలుగుదేశం నాయకులను కూడా ఇబ్బంది పెడుతోందని అంటున్నారు. తమ అసహనాన్ని వారు పార్టీలో వ్యక్తం చేస్తున్నట్లు కూడా తెలుస్తోంది. తెలంగాణ ప్రజల్లో చంద్రబాబుకు విశ్వాసం కుదరడం లేదని, పైగా తీవ్ర అవిశ్వాసం పేరుకుపోతోందని, చంద్రబాబు పర్యటననలకు ఆటంకాలు కలిగించడానికి ఇది ప్రధాన కారణమని పార్టీలే అంటున్నాయి.