వైఎస్ కు ఎన్టీఆర్ ఆదర్శం: జగన్ ఓదార్పులో లక్ష్మీపార్వతి

నెల్లూరు: నెల్లూరు జిల్లాలో కడప పార్లమెంటు సభ్యుడు వైఎస్ జగన్మోహన్ రెడ్డి చేపడుతున్న యాత్రలో ఎన్టీఆర్ తెలుగు దేశం పార్టీ అధ్యక్షురాలు లక్ష్మీపార్వతి పాల్గొన్నారు. నెల్లూరు జిల్లా గాంధీ బొమ్మ సెంటర్లో ఆమె ప్రసంగించారు. తండ్రి ఆశయాల సాధనకు యువకిశోరం జగన్ చేపడుతున్న యాత్రను ఆమె ప్రశంసించారు. పార్టీలకతీతంగా ప్రజలు జగన్ కు అందరూ బ్రహ్మరథం పడుతున్నరని ఆమె చెప్పారు. జగన్ ఓదార్పుకు ప్రజలనుండి వస్తున్న స్పందన చూసి అందరూ ఆయన వెంట రావడానికి సిద్ధమవుతున్నారన్నారు.

దివంగత ఎన్టీఆర్ ప్రజా సంక్షేమం కోసం 2 కిలోల బియ్యం వంటి పథకాలు ప్రవేశపెడితే వాటిని తెలుగు దేశం పార్టీ అధ్యక్షుడు నారా చంద్రబాబునాయుడు వెనక్కి తీసుకున్నాడని, ఎన్టీఆర్ కు వెన్నుపోటు పొడిసిన చంద్రబాబు ఆయన పథకాలకు పోటు పొడిశాడని ఆరోపించారు. ఎన్టీఆర్ ను ఆదర్శంగా తీసుకొని వైఎస్ రాజశేఖర్ రెడ్డి ఎన్టీఆర్ పథకాలను ప్రవేశపెట్టాడన్నారు.