పోతుల సురేష్ భద్రతపై అనంతపురం అధికారులు చేతులెత్తేశారు: గోపీనాథ్

హైదరాబాద్: తెలుగుదేశం దివంగత శాసనసభ్యుడు పరిటాల రవి ముఖ్య అనుచరుడు పోతుల సురేష్ కు భద్రత కల్పించలేమని అనంతపురం జైలు అధికారులు చేతులెత్తేశారని, దాంతో పోతుల సురేష్ ను హైదరాబాదులోని చర్లపల్లి జైలుకు తరలించామని జైళ్ల శాఖ డైరెక్టర్ జనరల్ (డిజి) గోపీనాథ్ రెడ్డి చెప్పారు. చర్లపల్లి జైలు సేఫ్ జోన్ కాబట్టి పోతుల సురేష్ ను ఇక్కడి తెచ్చినట్లు ఆయన తెలిపారు. జైళ్లలో జామర్లను ఏర్పాటు చేసే విషయంపై పరిశీలన జరుపుతున్నామని, ఇందుకు విదేశీ నిపుణులను రప్పిస్తున్నామని ఆయన చెప్పారు. అవసరం మేరకు జైళ్లలో సిబ్బందిని నియమిస్తున్నట్లు ఆయన తెలిపారు.

పోతుల సురేష్ ను ఇటీవల సూరత్ లో అనంతపురం ప్రత్యేక పోలీసు బృందం అరెస్టు చేసి రాష్ట్రానికి తీసుకుని వచ్చింది. పోతుల సురేష్ కు తాము ఇక్కడ భద్రత కల్పించలేమని అనంతపురం జైలు అధికారులు చెప్పారు. అనంతపురం జైలులో ఇప్పటికే పరిటాల రవి హత్య కేసు నిందితులు ఉన్నారు. వారి నుంచి పోతుల సురేష్ కు ప్రాణ హాని ఉండవచ్చునని అనంతపురం జైలు అధికారులు అనుమానాలు వ్యక్తం చేశారు. దీంతో పోతుల సురేష్ ను హైదరాబాదులోని చర్లపల్లి జైలుకు తరలించారు.