నాపై తెలుగుదేశంలో కుట్ర చేసి ఎన్నికల్లో నన్ను ఓడించారు: రోజా

హైదరాబాద్: తెలుగుదేశం పార్టీలో నాపై కుట్ర జరిగిందని తెలుగుదేశం పార్టీ మాజీ మహిళా అధ్యక్షురాలు, సినీ నటి రోజా ఓ టీవి ఛానల్ కు ఇచ్చిన ఇంటర్వ్యూలో అన్నారు. నేను గెలిచే చోట టిక్కెట్ ఇవ్వకుండా తెలుగుదేశం పార్టీలో కొందరు కుట్ర చేశారని అన్నారు. పార్టీ ఆదేశించిన నియోజకవర్గంలో పోటీ చేసినప్పటికీ ఆక్కడి టిడిపి పార్టీవారు సైతం నన్ను కుట్ర చేసి ఓడించారని వాపోయారు. నా కులం, నా అభిమానులు, నా బలమున్న చోట తెలుగుదేశం టిక్కిట్ కేటాయించలేదన్నది.

నా నియోజకవర్గాన్ని పార్టీ అధినేత చంద్రబాబునాయుడిని తిట్టిన గాలి ముద్దుకృష్ణమనాయుడికి ఇచ్చి గెలిపించారని ఆరోపించారు. తెలుగుదేశంలో ఉన్నప్పుడు చంద్రబాబుతో సహా అందరూ నన్ను పొడిగిన వారేనని గుర్తు చేశారు. సోమిరెడ్డి చంద్రమోహన రెడ్డికి నామీద కడుపుమంట ఉన్నందువల్లే ఐరన్ లెగ్ అని అంటున్నాడని ధ్వజమెత్తింది. ప్రస్తుతానికి తాను ఏ పార్టీలో లేనని ఏ పార్టీలో చేరేది ఇంకా నిర్ణయించుకోలేదన్నది. తనకు ప్రాధాన్యమిచ్చే పార్టీలోకి వెళతానని అంటోంది. శ్రీ పొట్టి శ్రీరాములు నెల్లూరు జిల్లాలో కడప పార్లమెంటు సభ్యుడు వైయస్ జగన్మోహన్ రెడ్డి ఓదార్పుయాత్ర ముగింపు సభలో పాల్గొనడంలో రాజకీయ కోణం లేదని ప్రకటించింది.