కెవిపి రామచందర్ రావుకు మంత్రి దానం నాగేందర్ కితాబు

హైదరాబాద్: ముఖ్యమంత్రి కె. రోశయ్యపై, ప్రభుత్వ సలహాదారు కెవిపి రామచందర్ రావుపై తెలుగుదేశం పార్టీ అధినేత చంద్రబాబు నాయుడు చేసిన విమర్శలపై రాష్ట్ర ఆరోగ్య శాఖ మంత్రి దానం నాగేందర్ తీవ్రంగా ప్రతిస్పందించారు. కెవిపి రామచందర్ రావుకు కితాబు ఇచ్చారు. పదవి కావాలని కెవిపి కోరలేదని ఆయన బుధవారం మీడియా ప్రతినిధుల సమావేశంలో చెప్పారు. ఎమ్మార్ ప్రాపర్టీస్ వ్యవహారంలో ప్రభుత్వం నయా పైసా కూడా వదులుకోదని ఆయన చెప్పారు. రోశయ్యను, కెవిపిని విమర్సించే నైతిక అర్హత తెలుగుదేశం పార్టీ నాయకులకు లేదని ఆయన అన్నారు.

రోశయ్య అనుభవమంత కూడా చంద్రబాబు వయస్సు లేదని ఆయన అన్నారు. రోశయ్య వయస్సే చంద్రబాబు ఆరోపణలకు సమాధానమని ఆయన అన్నారు. చంద్రబాబు తాను ఇంకా యువకుడినేనని అనుకుంటున్నారని, అందుకే ముఖ్యమంత్రి పదవి యువకులకు ఇవ్వాలని అంటున్నారని, తనకు 60 ఏళ్లు దాటిన విషయాన్ని చంద్రబాబు గమనించడం లేదని దానం నాగేందర్ అన్నారు. తెలుగుదేశం పార్టీ నాయకుడు గాలి ముద్దు కృష్ణమ నాయుడికి మతి భ్రమించిందని, చంద్రబాబు వద్ద మార్కులు కొట్టేయడానికి రోశయ్యపై విమర్శలు చేస్తున్నారని ఆయన అన్నారు. గాలి ముద్దు కృష్ణమనాయుడికి కాంగ్రెసు ఉచితంగా చికిత్స చేయిస్తుందని ఆయన చెప్పారు. హైదరాబాద్ క్రికెట్ అసోసియేషన్ తీరు సిగ్గు చేటుగా ఉందని ఆయన అన్నారు.