తెలంగాణకు జైకొట్టిన లోకసత్తా జయప్రకాష్ నారాయణ

సిద్దిపేట: మెదక్‌ జిల్లాలో రైతులను కలిసి వారి సమస్యలు తెలుసుకునేందుకు మంగళవారం వచ్చిన లోక్‌సత్తా అధినేత జయప్రకాష్ నారాయణను పలుచోట్ల తెలంగాణవాదులు అడ్డుకున్నారు. జై తెలంగాణ అని నినాదం చేయాల్సిందిగా కొండపాక మండలం దుద్దెడ, చిన్నకోడూరు మండలం రామునిపట్లలో తెలంగాణవాదులు, ప్రజలు పట్టుబట్టారు. దీంతో ఆయన జై తెలంగాణ అంటూ నినదించారు. సిద్దిపేటలో తెలంగాణపై మీ వైఖరి స్పష్టం చేయాలని తెరాస విద్యార్థి విభాగం శ్రేణులు జేపీని అడ్డుకున్నారు. దీంతో, రాష్ట్రం ఏర్పాటైనా, ఏర్పాటు కాకపోయినా నష్టమేమీ లేదంటూ ఆయన సమాధానం దాటవేశారు. పోలీసులు రంగం ప్రవేశం చేసి వారిని తప్పించడంతో జేపీ వెళ్లిపోయారు.

భారత్‌ అభివృద్ధి చెందిందని అమెరికా అధ్యక్షుడు ఒబామా చేసిన వ్యాఖ్యలు మనం నమ్మితే అంతకన్నా తెలివి తక్కువ విషయం మరొకటి ఉండదన్నారు. కొండపాక, చిన్నకోడూరు మండలాల్లో రైతులతో ఇష్టాగోష్టి నిర్వహించారు. ఆయా కార్యక్రమాల్లో జేపీ మాట్లాడుతూ వ్యవసాయం చేసే వారి తలసరి ఆదాయం కేవలం రూ.15 వేలు మాత్రమే ఉండటం బాధాకరమన్నారు.