భారతీయ జనతా పార్టీలోకి నరేంద్ర రీ ఎంట్రీ

హైదరాబాద్: మాజీ పార్లమెంటు సభ్యుడు ఎ నరేంద్ర తిరిగి సొంత గూటికి చేరుకున్నట్లే కనిపిస్తున్నారు. ఆయన తిరిగి భారతీయ జనతా పార్టీ (బెజిపి)లోకి తిరిగి ప్రవేశించారు. ఈ రీ ఎంట్రీ చడీ చప్పుడు లేకుండా జరిగిపోయింది. ఆర్ఎస్ఎస్ పై కాంగ్రెసు చేసిన వ్యాఖ్యలకు నిరసనగా బిజెపి ఏర్పాటు చేసిన ధర్నా కార్యక్రమంలో ఆయన బుధవారం పాల్గొన్నారు. బిజెపి సీనియర్ నేతలు బండారు దత్తాత్రేయతో పాటు ఆయన కూడా ధర్నాలో పాల్గొని తన రీ ఎంట్రీని ధ్రువీకరించారు.

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుతో విభేదించి బయటకు వచ్చిన ఆయన తెలంగాణకు సంబంధించి ఓ విస్తృత వేదికను ఏర్పాటు చేసే ప్రయత్నం చేశారు. అయితే, అది అందుకు ముందుకు సాగలేదు. బిజెపి నుంచి బయటకు వచ్చి తెలంగాణ సాధన సమితిని ఏర్పాటు చేసిన ఆయన తెరాసలో చేరారు. కేంద్ర మంత్రి పదవిని కూడా చేపట్టారు. అయితే, కెసిఆర్ తో విభేదించి యుపిఎ ప్రభుత్వంపై ప్రతిపక్షాలు ప్రతిపాదించిన అవిశ్వాస తీర్మానంపై కాంగ్రెసుకు అనుకూలంగా వ్యవహరించి సంచలనం సృష్టించారు.