ఎన్టీఆర్ ను ముఖ్యమంత్రి పదవి నుంచి కూల్చిన కుట్రలో రోశయ్య?

హైదరాబాద్: స్వర్గీయ ఎన్టీ రామరావును ముఖ్యమంత్రి పదవి నుంచి గద్దె దింపిన కుట్రలో ప్రస్తుత ముఖ్యమంత్రి కె. రోశయ్య కూడా పాలు పంచుకున్నారా? అవుంటున్నారు తెలుగుదేశం సీనియర్ నేత యనమల రామకృష్ణుడు. ఇప్పటి వరకు తెలుగుదేశం ప్రస్తుత అధ్యక్షుడు నారా చంద్రబాబు నాయుడు ఎన్టీ రామారావును గద్దె దించారనే ఆరోపణ ఉంది. ఎన్టీ రామారావును గద్దె దింపడానికి చంద్రబాబు అనుసరించిన వ్యూహంలో యనమల రామకృష్ణుడు కూడా ప్రధాన పాత్రధారి. ఎన్టీఆర్ ను కూల్చడానికి జరిగిన కుట్రలో రోశయ్య కూడా భాగస్వామియేనని ఆయన బుధవారం మీడియా ప్రతినిధుల సమావేశంలో ఆరోపించారు. ఎన్టీఆర్ ను హత్య చేసి చంద్రబాబు ముఖ్యమంత్రి పీఠం అధిష్టించారని రోశయ్య చేసిన విమర్శకు యనమల ఆ విధంగా ప్రతిస్పందించారు.

చంద్రబాబుపై రోశయ్య చేసిన విమర్శలకు యనమల రామకృష్ణుడు తీవ్రంగా ప్రతిస్పందించారు. రోశయ్యది బ్లాక్ మెయిల్ చరిత్ర అని ఆయన దుమ్మెత్తిపోశారు. ముఖ్యమంత్రులకు రోశయ్య అద్దె మైకుగా పని చేశారని ఆయన వ్యాఖ్యానించారు. అవినీతి నేతలకు కొమ్ము కాసిన శుక్రాచార్యుడిగా ఆయన రోశయ్యను అభివర్ణించారు. చంద్రబాబుపై చేసిన వ్యాఖ్యలకు క్షమాపణ చెప్పాలని ఆయన ముఖ్యమంత్రిని డిమాండ్ చేశారు. రోశయ్యను ఆయన రాజకీయ వ్యభిచారిగా అభివర్ణించారు. చంద్రబాబుపై రోశయ్య చేసిన విమర్శలు తీవ్ర దుమారం రేపుతున్నాయి. తెలుగుదేశం నాయకులు రోశయ్యపై తీవ్ర వ్యాఖ్యలు చేస్తున్నారు. కాంగ్రెసు, తెలుగుదేశం పార్టీ నాయకులు పరస్పరం దుమ్మెత్తిపోసుకుంటున్నారు.