కె చంద్రశేఖర రావుకు తెలంగాణ ప్రజాఫ్రంట్ నేత గద్దర్ స్నేహ హస్తం

కరీంనగర్: తెలంగాణ ప్రజా ఫ్రంట్ అధ్యక్షుడు గద్దర్ తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు స్నేహానికి సిద్ధపడ్డారు. కెసిఆర్ కు వ్యతిరేకంగా తెలంగాణ ఉద్యమాన్ని గద్దర్ నిర్మించడానికి సిద్ధపడినట్లు తొలుత వార్తలు వచ్చాయి. ఆ వార్తలను బలపరిచినట్లుగానే ఆయన కెసిఆర్ పై విమర్శలు చేశారు. అయితే తాజాగా ఆయన కెసిఆర్ తో కలిసి పనిచేయడానికి సిద్ధపడ్డారు. కెసిఆర్ తో విభేదాలను పరిష్కరించుకుని కలిసి పనిచేయడానికి తాను సిద్ధంగా ఉన్నట్లు ప్రకటించారు. మిత్రవైరుధ్యాలు పరిష్కరించుకుని, టీఆర్ఎస్ అధినేత కేసీఆర్‌తో కలిసి పోరాడేందుకు తాము సిద్ధమేనని ఆయన స్పష్టం చేశారు. ఐక్య పోరాటంతో సామాజిక తెలంగాణను సాధించుకుందామని పిలుపునిచ్చారు.

ప్రత్యేక రాష్ట్రం కోసం ఉద్యమకారులంతా కలిసిపోరాడాలని, ఉద్యమాలతోనే తెలంగాణ సాధ్యమని ఆయన ఉద్ఘాటించారు. బుధవారం కరీంనగర్‌లోని కళాభారతిలో తెలంగాణ ప్రజాఫ్రంట్‌కు మద్దతుగా జరిగిన అణగారిన ప్రజల హక్కుల పోరాట కమిటీ జిల్లా సదస్సులో ఆయన మాట్లాడారు. ప్రజాఫ్రంట్ రాజకీయ పార్టీ కాదని, ఉద్యమకారులను కలుపుకొని, తెలంగాణ సాధనకు పోరాడే శక్తి అని పేర్కొన్నారు. విద్యార్థుల ఉద్యమాలతోనే డిసెంబర్‌లో ఢిల్లీ పాలకవర్గం కదిలిందన్నారు. డిసెంబర్ 9 చిదంబరం ప్రకటనలో మోసం ఉందని, చివరికి శ్రీకృష్ణ కమిటికీ వ్యవహారం మళ్ళిందన్నారు. శ్రీకృష్ణ కమిటీ నివేదిక తెలంగాణకు అనుకూలంగా రాదని ఆయన అభిప్రాయపడ్డారు.