కేశవరావుతో కె చంద్రశేఖర రావు తెలంగాణ మంత్రాంగం

న్యూఢిల్లీ: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు గురువారం కాంగ్రెసు తెలంగాణ సీనియర్ నేత కె. కేశవ రావుతో మంతనాలు జరిపారు. వీరిద్దరు పార్లమెంటు సెంట్రల్ హాల్లో కలుసుకుని చర్చలు జరిపారు. తాజా రాజకీయాలపై వారు చర్చించినట్లు వార్తలు వచ్చాయి. శ్రీకృష్ణ కమిటీ సభ్య కార్యదర్శి వికె దుగ్గల్ కాంగ్రెసు సీమాంధ్ర పార్లమెంటు సభ్యుడు టి. సుబ్బిరామిరెడ్డి ఇచ్చిన విందుకు హాజరు కావడంపై కూడా వారిద్దరి మధ్య మంతనాలు జరిగినట్లు సమాచారం.

కాంగ్రెసు తెలంగాణ ఉద్యమానికి కేశవరావు నాయకత్వం వహిస్తున్న విషయం తెలిసిందే. ఈ నేపథ్యంలో కేశవరావుతో కెసిఆర్ చర్చలు జరపడం ప్రాధాన్యాన్ని సంతరించుకుంది. కాగా, కెసిఆర్, కాకతీయ విశ్వవిద్యాలయం మాజీ వైస్ చాన్సలర్ జయశంకర్ తో కలిసి శుక్రవారం శ్రీకృష్ణ కమిటీతో భేటీ కానున్నారు.