ఎన్టీఆర్ పై రామోజీరావు, చంద్రబాబు కుట్ర చేశారు: లక్ష్మీపార్వతి

హైదరాబాద్: ఈనాడు గ్రూపు సంస్థల చైర్మన్ రామోజీరావు డాల్ఫిన్ హోటల్లో తెలుగుదేశం పార్టీ అధ్యక్షుడు చంద్రబాబునాయుడుతో కూర్చొని దివంగత ముఖ్యమంత్రి నందమూరి తారక రామారావు(ఎన్టీఆర్)కు వ్యతిరేకంగా కుట్రలు చేశారని ఎన్టీఆర్ తెలుగుదేశం పార్టీ అధ్యక్షురాలు లక్ష్మీపార్వతి అన్నారు. ఎన్టీఆర్ వల్ల రామోజీరావు తన మానస పుత్రిక ఈనాడు సర్క్యులేషన్ పెంచుకున్నారని, కానీ రామోజీరావు ఈనాడు వల్ల ఎన్టీఆర్ ఏ మాత్రం లబ్ధి చేకూరలేదని ఆమె విమర్శించారు. ఎన్టీఆర్ పార్టీని స్థాపించినప్పుడు రామోజీరావే స్వయంగా వచ్చి తాను పార్టీకి అనుకూలంగా ఉంటానని చెప్పాడని ఆమె అన్నది. ఎన్నికల సమయంలో తోడ్పాటు అందిస్తానని రామోజీరావే స్వయంగా చెప్పటంతో తన సొంత ఇమేజ్ ఉన్నప్పటికీ అప్పుడు పార్టీకి ఒక పత్రిక అవసరం కావటంతో ఎన్టీఆర్ ఒప్పుకున్నారని, అయితే ఆ తర్వాత పెద్ద మొత్తంలో బిల్లును పంపించడాన్ని ఎన్టీఆర్ జీర్ణించుకోలేక పోయాడని చెప్పారు.

1994 ఎన్నికలకు ముందు రామోజీరావు ఎన్టీఆర్ ను బద్దవిరోధిగా చూశారన్నరు. ఓ సమయంలో సారా వ్యతిరేకోద్యమం కోసం పోరాడుతున్న ఎన్టీఆర్ కు వ్యతిరేకంగా రామోజీరావు కూడా సారా వ్యతిరేక ఉద్యమం పేరుతో జెండా పట్టుకొని ఊరూరా తిరుగారని గుర్తు చేశారు. 1994 ఎన్నికల్లో తెలుగుదేశం పార్టీ ఓడిపోతుందని ఎన్టీఆర్ ను రామోజీరావు భయపెట్టాడని చెప్పారు. తమ రిపోర్టు ప్రకారం పార్టీ చిత్తుగా ఓడిపోతుందని, అనుకోని పరిస్థితుల్లో గెలిచినప్పటికీ రెండుమూడూ సీట్లతో గెలుస్తుందని, దాంతో రెండు మూడు రోజుల్లో ప్రభుత్వం పతనం ఖావడం ఖాయమని రామోజీరావు ఎన్టీఆర్ మానసిక స్థైర్యాన్ని దెబ్బతీయడానికి ప్రయత్నించారని, అయితే అందుకు విరుద్ధంగా తెలుగుదేశం పార్టీ భారీ మెజారిటీతో విజయం సాధించిందన్నారు. అప్పటినుండే రామోజీరావు, చంద్రబాబు కుమ్మక్కై ఎన్టీఆర్ ను తప్పించే ప్రయత్నం చేశారన్నారు. ఆ సమయంలోనే ప్రజల్లో ఎన్టీఆర్ కు వ్యతిరేకంగా, చంద్రబాబు అనుకూలంగా ప్రచారం కోసం ఈనాడుకు తోడు ఈటీవి రావటం అందరూ గమనించాలని ఆమె అన్నారు.