మూసుకున్న తలుపులు: చిరంజీవితోనే వంగవీటి రాధాకృష్ణ

విజయవాడ: కాంగ్రెసు, తెలుగుదేశం పార్టీలు తలుపులు మూసుకోవడంతో చిరంజీవి నాయకత్వంలోని ప్రజారాజ్యం పార్టీలో కొనసాగాల్సిన అనివార్యతలో విజయవాడ నాయకుడు వంగవీటి రాధాకృష్ణ పడ్డారు. దీంతో చిరంజీవితోనే ఉండాలని ఆయన ప్రస్తుతానికి నిర్ణయించుకున్నట్లు అర్థమవుతోంది. చిరంజీవి అంతటివాడు పిలిచి పార్టీ నుంచి వెళ్లిపోవద్దని చెప్పినప్పుడు వినకుండా ఎలా ఉంటానని వంగవీటి రాధాకృష్ణ అన్నారు. చిరంజీవి మాటను కాదనలేకపోతున్నట్లు ఆయన తెలిపారు. చిరంజీవి పట్ల తీవ్ర అసంతృప్తితో వేగిపోయిన ఆయన కాంగ్రెసులో గానీ తెలుగుదేశం పార్టీలో గానీ చేరడానికి ప్రయత్నించారని వినికిడి. అయితే, ఆయనకు ప్రత్యర్థుల నుంచి తీవ్ర వ్యతిరేకత రావడంతో అది సాధ్యం కాలేదని అంటున్నారు.

కాంగ్రెసు విజయవాడ సెంట్రల్ శాసనసభ్యుడు మల్లాది విష్ణు వంగవీటి రాధాకృష్ణను పార్టీలోకి తీసుకోవడానికి ఏ మాత్రం సుముఖంగా లేరని సమాచారం. వంగవీటి రాధాకృష్ణ తండ్రి వంగవీటి రంగాకు మల్లాది విష్ణు కుడిభుజంగా పనిచేశారు. అదే సమయంలో రంగాకు డ్రైవర్ గా కూడా పనిచేశారు. అయినా పార్టీలోకి రాకుండా ఆయన రాధాను అడ్డుకున్నట్లు తెలుస్తోంది. బొండా ఉమామహేశ్వర రావు తెలుగుదేశంలోకి రాధా రాకుండా అడ్డుకున్నట్లు సమాచారం. విజయవాడలో తెలుగుదేశం పార్టీకి ప్రధాన కాపు నాయకుడు బొండా ఉమామహేశ్వర రావు ఒక్కరే. అందువల్ల ఉమామహేశ్వర రావు మాటను కాదని రాధాను తెలుగుదేశం పార్టీ నాయకత్వం తీసుకునే పరిస్థితి లేదని అంటున్నారు.