ఇరకాటంలో కేశవరావు: చంద్రశేఖర రావుతో భేటీపై వివరణ

న్యూఢిల్లీ: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావుతో భేటీతో కాంగ్రెసు తెలంగాణ ప్రాంత సీనియర్ నేత కె. కేశవరావు ఇరకాటంలో పడినట్లు కనిపిస్తున్నారు. ముఖ్యమంత్రిగా కేంద్ర మంత్రి ఎస్ జైపాల్ రెడ్డి అవకాశాలను దెబ్బ తీసి, తన అవకాశాలను మెరుగుపరుచుకోవడానికి తాను కెసిఆర్ తో భేటీ అయినట్లు వార్తలు రావడంతో ఆయన తీవ్రంగా ఇబ్బంది పడినట్లు తెలుస్తోంది. దానివల్లనే ఆయన ఆయన వివరణ ఇచ్చారని అంటున్నారు. ముఖ్యమంత్రి పదవికి జైపాల్ రెడ్డి ఉత్తమ అభ్యర్థి అని, జైపాల్ రెడ్డి ముఖ్యమంత్రిగా వస్తే తాను కూడా మద్దతిస్తానని ఆయన అన్నారు.

పదవి కోసం తాను కెసిఆర్ తో సమావేశం కాలేదని, తెలంగాణ విషయాలపై చర్చించడానికి మాత్రమే తామిద్దరం సమావేశమయ్యామని ఆయన స్పష్టం చేశారు. కెసిఆర్ ను కాంగ్రెసుకు దగ్గర చేసి అధిష్టానం వద్ద మార్కులు కొట్టేయాలని కేశవరావు చేసిన ప్రయత్నంలో భాగంగానే గురువారంనాటి భేటీ జరిగిందనే వార్తలు వచ్చాయి. ముఖ్యమంత్రి పదవి కోసం కేశవరావు కెసిఆర్ తో కలిసి ప్రయత్నాలు ప్రారంభించారని కూడా అన్నారు.