కెసిఆర్ కాంగ్రెసుతో కలిసినట్లు నటిస్తున్నారు: శైలజానాథ్

హైదరాబాద్: కాంగ్రెసుతో కలిసినట్లు తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు నటిస్తున్నారని, కెసిఆర్ ను నమ్మబోమని కాంగ్రెసు సీనియర్ శానససభ్యుడు శైలజానాథ్ వ్యాఖ్యానించారు. తమను మోసం చేయడానికి కెసిఆర్ ఆ విధంగా నటిస్తున్నారని ఆయన శుక్రవారం మీడియా ప్రతినిధుల సమావేశంలో అన్నారు. కెసిఆర్ నిజమైన తెలంగాణవాది కారని, అవకాశవాది అని ఆయన వ్యాఖ్యానించారు. కాంగ్రెసుపై, సోనియాపై కెసిఆర్ చేసిన విమర్శలను తాము మర్చిపోలేదని ఆయన అన్నారు. శ్రీకృష్ణ కమిటీ నివేదికకు కట్టుబడి ఉంటామని ప్రకటిస్తే కెసిఆర్ ను కలుపుకోవడానికి అభ్యంతరం లేదని ఆయన అన్నారు. తెరాసపై ప్రజల్లో విశ్వాసం సన్నగిల్లుతోంది కాబట్టే తిరిగి కాంగ్రెసు వైపు కెసిఆర్ వస్తున్నారని ఆయన అన్నారు.

కెసిఆర్ తీరును తెలంగాణ ప్రాంతానికి చెందిన కాంగ్రెసు సీనియర్ శాననసభ్యుడు పి. శంకరరావు కూడా వ్యతిరేకించారు. తెలంగాణపై కెసిఆర్ కు చిత్తశుద్ధి లేదని ఆయన విడిగా మీడియా ప్రతినిధుల సమావేశంలో అన్నారు. ప్రత్యేక రాష్ట్రంపై కెసిఆర్ రోజుకో మాట మాట్లాడుతున్నారని ఆయన విమర్శించారు. కాంగ్రెసు పార్టీని బలోపేతం చేయడానికి కెసిఆర్ ఎవరని ఆయన అడిగారు. తెలంగాణ ఇచ్చిందని కెసిఆర్ ఇది వరకే చెప్పి ఉంటే విద్యార్థుల ఆత్మహత్యలు ఆగి ఉండేవని ఆయన అన్నారు.