గొనె ప్రకాశరావును హన్మకొండలో అడ్డుకున్న తెలంగాణవాదులు

వరంగల్: వరంగల్ జిల్లా హన్మకొండలో కాంగ్రెసు నాయకుడు, కాంగ్రెసు కడప పార్లమెంటు సభ్యుడు వైయస్ జగన్ అనుచరుడు గోనె ప్రకాశ రావుకు చేదు అనుభవం ఎదురైంది. తమ పార్టీ అధ్యక్షుడు కె. చంద్రశేఖరరావుపై అనుచిత వ్యాఖ్యలు చేసినందుకు ఆగ్రహించిన తెలంగాణ రాష్ట్ర సమితి (తెరాస) కార్యకర్తలు గోనె ప్రకాశరావు అడ్డుకున్నారు. హన్మకొండలోని ప్రెస్ క్లబ్ లో మాట్లాడుతుండగా గోనె ప్రకాశరావును వారు శనివారం అడ్డుకున్నారు. దీంతో తీవ్ర ఉద్రిక్తత నెలకొంది. ప్రకాశరావును పోలీసులు తమ వాహనంలో ఎక్కించుకుని తీసుకెళ్లే ప్రయత్నం చేశారు. దీన్ని కూడా అడ్డుకోవడానికి తెరాస కార్యకర్తలు ప్రయత్నించారు. కెసిఆర్ పై అనుచిత వ్యాఖ్యలకు క్షమాపణ చెప్పాలని తెరాస కార్యకర్తలు గోనె ప్రకాశరావును డిమాండ్ చేశారు.

తెరాస కార్యకర్తల తీరుపై గోనె ప్రకాశ రావు తీవ్ర ఆగ్రహం వ్యక్తం చేశారు. తెలంగాణ కోసం తాను ఆత్మార్పణ చేసుకోవడానికి సిద్ధంగా ఉన్నానని ఆయన అన్నారు. కెసిఆర్ తెలంగాణ ఉద్యమాన్ని తన కుటుంబ ప్రయోజనాల కోసం వాడుకుంటున్నారని ఆయన అన్నారు. ఫిబ్రవరిలో పార్లమెంటు ముందు ఆత్మార్పణ చేసుకోవడానికి సిద్ధంగా ఉన్నానని, తనతో పాటు కెసిఆర్ ఇద్దరు శాసనసభ్యులను పంపాలని, నాలుగో వ్యక్తిని తన కూతురునో, కుమారుడినో, అల్లుడినో, నాయని నర్సింహారెడ్డినో పంపాలని ఆయన అన్నారు. ఈ విషయంపై మాట్లాడడానికి తాను కెసిఆర్ ఇంటికి కూడా వస్తానని ఆయన అన్నారు.