తెలంగాణ కోసం నెహ్రూకి వినతిపత్రం: భాజపా నినుత్న నిరసన

హైదరాబాద్‌: సీమాంధ్రులనుండి తెలంగాణ ప్రాంతానికి విడాకులు ఇప్పించి, విముక్తి కలిగించాలని భారతీయ జనతా పార్టీ తెలంగాణ ఉద్యమ కమిటీ ఆధ్వర్యంలో దివంగత ప్రధాని జవహర్ లాల్ నెహ్రూ జయంతి సందర్భంగా నెహ్రూకు వినతి పత్రం ఇచ్చి వినూత్న నిరసన తెలిపారు. హైదరాబాదులోని ఆబిడ్స్ లోని నెహ్రూ విగ్రహానికి వినతి పత్రం ఇచ్చిన అనంతరం కాసేపు ఆందోళన నిర్వహించారు. తెలంగాణకు అనుకూలంగా నినాదాలు చేశారు. తెలంగాణ ఇవ్వాల్సిందేనని డిమాండ్ చేశారు.

జవహర్ లాల్ నెహ్రూ సీమాంధ్ర, తెలంగాణను కలిపేటప్పుడే వారికి ఇష్టం ఉన్నప్పుడు విడిపోవచ్చునని చెప్పాడని వారు ఈ సందర్భంగా గుర్తు చేశారు. తెలంగాణ వారని అమాయకులని నెహ్రూ అప్పుడే అన్నారని గుర్తు చేశారు. కాంగ్రెసు ప్రభుత్వం తెలంగాణ కోసం ఈ శీతాకాలపు సమావేశాల్లో తెలంగాణ బిల్లు పెట్టాలని వారు డిమాండ్ చేశారు. లేదంటే భాజపా ఆధ్వర్యంలో ఉద్యమం ఉధృతం చేస్తామని హెచ్చరించారు.బాలల దినోత్సవం సందర్భంగా నిర్వహించిన ఈ నిరసన కార్యక్రమంలో పలువురు స్థానిక బిజెపి నేతలు పాల్గొన్నారు. రాబోయే ఏడాది నాటికి తెలంగాణ సిద్ధించాలని ఆకాంక్షించారు.