జయప్రద, అమర్ సింగ్ లకు సుప్రీంకోర్టు నుంచి ఊరట

న్యూఢిల్లీ‌: సమాజ్ వాదీ పార్టీ బహిష్కృత పార్లమెంటు సభ్యులు జయప్రద, అమర్ సింగ్ లకు సుప్రీంకోర్టు నుంచి కొంత ఊరట లభించింది. బహిష్కరణకు గురైన తర్వాత కూడా పార్టీ విప్ ను గౌరవించాలనే విషయంపై వారిద్దరి మీద కేసు నడుస్తోంది. వీరిద్దరి వ్యవహారాన్ని సుప్రీంకోర్టు పెద్ద బెంచ్ కు విన్నవించాలని జస్టిస్ అల్తమాస్ కబీర్, జస్టస్ సైరియాక్ జోసెఫ్ నిర్ణయించారు.

పార్టీ బహిష్కృతులైన అమర్ సింగ్, జయప్రదల స్థితి పార్లమెంటులో ఏమిటనేది తేల్చడానికి, ఏ పార్టీకి చెందకుండా వేరే గ్రూపుగా వారు వ్యవహరించడానికి గల అవకాశాలపై విచారణకు వారు పెద్ద బెంచ్ కు కేసును విన్నవించాలని నిర్ణయించారు. అమర్ సింగ్, జయప్రద పార్టీ వ్యతిరేక కార్యకలాపాలకు పాల్పడుతున్నారనే ఆరోపణపై పార్టీ నుంచి బహిష్కరణకు గురయ్యారు. బహిష్కరణకు గురైన తర్వాత తమను వేరే గ్రూపుగా వారిద్దరు ప్రకటించుకున్నారు.