తెలంగాణలోనూ వైయస్ అభిమానులు: శాసనసభ్యుడు శ్రీకాంత్ రెడ్డి

హైదరాబాద్: దివంగత ముఖ్యమంత్రి వైయస్ రాజశేఖర్ రెడ్డికి తెలంగాణలోను అభిమానులున్నారని రాయచోటి శాసనసభ్యుడు శ్రీకాంత్ రెడ్డి అన్నారు. ఆయన ప్రవేశ పెట్టిన సంక్షేమ పథకాలే ఆయనకు రాష్ట్రవ్యాప్తంగా, ప్రాంతీయలకతీతంగా అభిమానులను సాధించి పెట్టాయన్నారు. కేవలం సీమాంధ్రలో మాత్రమే కాదని, తెలంగాణ సెంటుమెంటును పక్కనపెట్టి తెలంగాణవారు ఆయనపై అభిమానం కురిపిస్తున్నారన్నారు.

ఆయనకు తెలంగాణలో అభిమానులు ఉన్నారనడానికి ఆదివారం నాటి భువనగిరి సభనే మంచి నిదర్శనమన్నారు. తెలంగాణ అమరవీరుల సంస్మరణ దినం సందర్భంగా వైయస్ ఫోటో పెట్టక పోవటాన్ని పలువురు అభిమానులు ప్రశ్నించిన విషయం గుర్తు చేశారు. వైయస్ రాజశేఖర్ రెడ్డి ఏ రోజు కూడా ప్రజాభిష్టానికి వ్యతిరేకంగా, విరుద్ధంగా వెళ్లలేదని చెప్పారు. భువనగిరితో పాటు ఇంతకుముందు మహబూబ్ నగర్ సంఘటన కూడా వైయస్ కు తెలంగాణలో ఉన్న అశేష అభిమానాన్ని బహిర్గతం చేస్తుందన్నారు.