చిరంజీవికి ప్రజారాజ్యం ఎమ్మెల్యే అనిల్ తెలంగాణ షాక్

హైదరాబాద్: సమైక్యాంధ్రకు కట్టుబడిన ప్రజారాజ్యం పార్టీ అధ్యక్షుడు చిరంజీవికి ఆ పార్టీ శాసనసభ్యుడు అనిల్ షాక్ ఇచ్చారు. పార్టీ వైఖరిని ధిక్కరిస్తూ ఆయన తెలంగాణకు అనుకూలంగా మాట్లాడారు. ఫ్రీజోన్ అంశంపై సోమవారం జరిగిన తెలంగాణ ప్రాంతం అఖిల పక్ష సమావేశానికి ఆయన హాజరయ్యారు. ఫ్రీజోన్ అంశం తేలేవరకు ఎస్సై పోస్టులకు రాతపరీక్షలను వాయిదా వేయాలని ఆయన కోరారు. అందుకు డిజిపి అరవింద్ రావును కలిసిన అఖిల పక్షంలో కూడా ఆయన ఉన్నారు.

తమ పార్టీ సమైక్యాంధ్రకు కట్టుబడి ఉందని, అయితే తాను తెలంగాణకు కట్టుబడి ఉన్నానని ఆయన చెప్పారు. తాను తెలంగాణ కోసం పనిచేస్తానని ఆయన స్పష్టం చేశారు. ఇప్పటికే పార్టీలో కొంత మంది నాయకులు తిరుగుబాటు బావుటా ఎగురవేస్తున్న తరుణంలో చిరంజీవికి అనిల్ వైఖరి ఇబ్బందికరమైందే.