నాగం జనార్దన్ రెడ్డిని పార్టీ నుంచి గెంటేస్తానని చంద్రబాబు బెదిరించారా?

హైదరాబాద్: ఫ్రీజోన్ వివాదంపై అఖిల పక్ష సమావేశం నిర్వహించినందుకు పార్టీ నుంచి గెంటేస్తానని తమ పార్టీ తెలంగాణ ప్రాంత నాయకుడు నాగం జనార్దన్ రెడ్డిని బెదిరించినట్లు తెలంగాణ గుండె చప్పుడు రాజ్ న్యూస్ ఆరోపించింది. ఫ్రీజోన్ అంశంపై ముందుకు వచ్చినందుకు నాగం జనార్దన్ రెడ్డిపై చంద్రబాబు నిప్పులు చెరుగుతున్నారని రాజ్ న్యూస్ వ్యాఖ్యానించింది. పార్టీలకు అతీతంగా తెలంగాణ ప్రాంతం నాయకులు ఒక్కటవుతుండడాన్ని చూసి ఓర్వలేక కసాయి బాబు తన నైజాన్ని బయట పెట్టుకున్నారని వ్యాఖ్యానించింది. అఖిల పక్ష సమావేశానికి సిపిఐ, సిపిఎం నాయకులు రాకుండా బాబు అడ్డుకున్నారని ఆరోపించింది.

తమ ప్రాంతంవారికి అన్యాయం జరుగుతుంటే మాట్లాడకూడదా అని తెలంగాణ ప్రాంత నాయకులు అడుగుతుంటే నేను చెప్తే వినరా అంటూ చంద్రబాబు తిట్లు తిట్టారని వ్యాఖ్యానించింది. తెలంగాణకు అనుకూలంగా వ్యవహరించే నాయకులను తమ చెమ్చాలు దేవేందర్ గౌడ్, నామా నాగేశ్వరరావులను అడ్డం పెట్టుకుని చంద్రబాబు పార్టీలో అణచివేస్తున్నారని విమర్సించింది. రెండు కళ్ల సిద్ధాంతం పేరుతో చంద్రబాబు తెలంగాణ పట్ల వివక్ష ప్రదర్సిస్తున్నారని, తమ సమైక్యవాద బుద్ధిని ప్రదర్శిస్తున్నారని వ్యాఖ్యానించింది. పార్టీలోని సీమాంధ్ర నాయకులు కాంగ్రెసు నాయకుడు లగడపాటి రాజగోపాల్ తో అఖిల పక్ష సమావేశాలు పెట్టినా, నన్నపనేని రాజకుమారి లగడపాటిని ముద్దు పెట్టుకున్నా చంద్రబాబు ఏమీ అనరని, తెలంగాణ నాయకులను మాత్రమే అదుపు చేయాలని చూస్తున్నారని అభిప్రాయపడింది.