ఫ్రీజోన్ పై హోంమంత్రి చిదంబరాన్ని కలిసిన తెలంగాణ కాంగ్రెసు ఎంపీలు

న్యూఢిల్లీ: ఫ్రీజోన్ వివాదంపై తెలంగాణకు చెందిన కాంగ్రెసు పార్లమెంటు సభ్యులు కేంద్ర హోంమంత్రి చిదంబరంను మంగళవారం పార్లమెంటు భవనంలో కలిశారు. ఫ్రీజోన్ అంశంపై కేంద్రం వెంటనే చర్యలుతీసుకోవాలని వారు చిదంబరాన్ని కోరుతూ వినతి పత్రాన్ని ఇచ్చారు. అలాగే ఫ్రీజోన్ అంశం తేలేవరకు ఎస్ఐ రాత పరీక్షలను నిలిపివేయాలని డిమాండ్ చేశారు. చిదంబరాన్ని కలిసిన పార్లమెంటు సభ్యుల్లో వివేక్, మందా జగన్నాధం, పొన్నం ప్రభాకర్ తదితరులు ఉన్నారు.

చిదంబరానికి వినతి పత్రం ఇచ్చిన అనంతరం ఎంపీలు ఆయనతో కాసేపు భేటీ ఆయ్యారు. ఫ్రీజోన్ వివాదంపై ఆయనకు వివరించారు. తెలంగాణ ప్రాంతం నుండి 12 మంది కాంగ్రెసు పార్లమెంటు సభ్యులం ఉన్నప్పటికి తెలంగాణకు సరియైన న్యాయం జరగటం లేదని వారు చిదంబరానికి విన్నవించుకున్నారు. వారు చెప్పిన విషయాన్ని చిదంబరం సావదానంగా విన్నట్టు సమాచారం.