ఫ్రీజోన్ విషయం లైఫ్ అండ్ డెత్ కు సంబంధించినది: కె చంద్రశేఖరరావు

హైదరాబాద్: ఫ్రీ జోన్ విషయం తెలంగాణకు లైఫ్ అండ్ డెత్ విషయమని తెలంగాణ రాష్ట్ర సమితి అధ్యక్షుడు, మహబూబ్ నగర్ పార్లమెంటు సభ్యుడు కె చంద్రశేఖరరావు అన్నాడు. ఫ్రీజోన్ విషయం తేలే వరకు ఎస్ఐ పోస్టుల రాత పరీక్షలను నిర్వహించరాదని ప్రభుత్వాన్ని ఆయన డిమాండ్ చేశారు. కేసు సుప్రీంకోర్టులో ఉన్నప్పుడు పరీక్షలు నిర్వహించరాదన్న విద్యార్థుల న్యాయమైన కోరికను ప్రభుత్వం అణగదొక్కాలని చూడటం బాధాకరమన్నారు. ముఖ్యమంత్రిగారే శాసనసభలో తీర్మానం పెట్టడానికి ఒప్పుకున్నప్పుడు డిజిపికి ఏం సంబంధమని ఆయన ప్రశ్నించారు. ప్రభుత్వం, సుప్రీంకోర్టుకన్నా డిజిపి ఎక్కువనా అని అన్నారు.

సబితారెడ్డి తెలంగాణ వ్యక్తి అని ఆమె తెలంగాణకు అన్యాయం జరుగుతుంటే చూసుకుంటూ కూర్చోవటం సరికాదన్నారు. అందులోనూ సబితారెడ్డి తెలంగాణ కోసం ఉద్యమించిన ఇంద్రారెడ్డి భార్య అని గుర్తు చేశారు. విద్యార్థులు ఫ్రీజోన్ వివాదం తేల్చాకే రాత పరీక్షలు నిర్వహించాలని డిమాండ్ చేయటంలో తప్పులేదన్నారు. తెలంగాణవాదులు అందరూ కలిసి తాడో పేడో తేల్చుకోవాల్సిన విషయమిది అని కెసిఆర్ అభిప్రాయపడ్డారు.