రెచ్చిపోయిన కేశవరావు వర్గం: కావూరిపై ఆందోళన, దిష్టిబొమ్మ దగ్ధం

హైదరాబాద్: తమ నాయకుడిపై చేసిన వ్యాఖ్యలపై కాంగ్రెసు పార్లమెంటు సభ్యుడు కావూరి సాంబశివరావుపై అదే పార్టీకి చెందిన పార్లమెంటు సభ్యుడు కె. కేశవరావు వర్గం భగ్గుమంటోంది. కావూరి వ్యాఖ్యలకు నిరసనగా హైదరాబాదులో ఆందోళనకు దిగింది. హైదరాబాదులోని ప్రెస్ క్లబ్ వద్ద కేశవరావు అనుచరులు కావూరి దిష్టిబొమ్మను దగ్ధం చేశారు. కావూరికి వ్యతిరేకంగా నినాదాలు చేశారు. కావూరి సాంబశివరావు కేశవరావుకు క్షమాపణ చెప్పాలని వారు డిమాండ్ చేశారు.

కేశవరావుపై కావూరి చేసిన వ్యాఖ్యలపై తెలంగాణకు చెందిన కాంగ్రెసు శాసనసభ్యుడు ఆర్. దామోదర్ రెడ్డి తీవ్రంగా మండిపడ్డారు. కావూరి సాంబశివ రావు మాటలు తెలంగాణ నాయకులను అవమానించే విధంగా ఉన్నాయని ఆయన అన్నారు. సిడబ్ల్యుసిలో కేశవరావును నియమించిన కాంగ్రెసు అధ్యక్షురాలు సోనియా గాంధీని కూడా కావూరి అవమానించినట్లేనని ఆయన అన్నారు.