చంద్రబాబుతో నేను దూరం కాలేదు: నాగం జనార్దన్ రెడ్డి

హైదరాబాద్: తనకూ తమ పార్టీ అధ్యక్షుడు నారా చంద్రబాబు నాయుడికీ మధ్య దూరం పెరిగిందనే వార్తలను తెలుగుదేశం పార్టీ తెలంగాణ ఫోరం కన్వీనర్ నాగం జనార్దన్ రెడ్డి స్పష్టం చేశారు. నిన్న కూడా తాను చంద్రబాబును కలిశానని ఆయన చెప్పారు. ఫ్రజోన్ అంశంపై నాగం జనార్దన్ రెడ్డి అఖిల పక్ష సమావేశం ఏర్పాటు చేయడంపై చంద్రబాబు మండిపడినట్లు వార్తలు వచ్చాయి. ఆ వార్తలపై నాగం జనార్దన్ రెడ్డి మంగళవారం మీడియా ప్రతినిధుల సమావేశంలో వివరణ ఇచ్చారు. తమ పార్టీ తెలంగాణకు కట్టుబడి ఉందని ఆయన చెప్పారు. ఫ్రీజోన్ అంశంపై తాను కాంగ్రెసు పార్టీని విమర్సించానని, ఫ్రీజోన్ అంశంపై ప్రభుత్వం జాప్యం చేస్తోందని అన్నానని, అందువల్ల తాను కాంగ్రెసును విమర్శించడం లేదనే వార్తల్లో నిజం లేదని ఆయన అన్నారు.

కాంగ్రెసుపై తాను అన్ని విధాలుగా పోరాటం చేశానని, వైయస్సార్ ను గానీ కాంగ్రెసు పార్టీని గానీ తాను లెక్క చేయలేదని ఆయన చెప్పారు. కేంద్ర మంత్రి ఎస్ జైపాల్ రెడ్డిని చాలా నెలలుగా తాను కలుసుకోలేదని, ఎప్పుడో ఓ పెళ్లిలో తాము కలుసుకున్నామని ఆయన అన్నారు. ఎందుకు తనపై దుష్ప్రచారం చేస్తున్నారో అర్థం కావడం లేదని ఆయన అన్నారు. పార్టీ నుంచి తాను ఏదీ ఆశించలేదని ఆయన అన్నారు.