ఒయు విద్యార్థుల ఆమరణ దీక్షను భగ్నం చేసిన పోలీసులు

హైదరాబాద్: డిసెంబర్లో ప్రభుత్వం నిర్వహించ తలపెట్టిన ఎస్ఐ రాత పరీక్షలు వెంటనే నిలిపివేయాలని గత ఐదు రోజులుగా ఆమరణ నిరాహార దీక్ష చేస్తున్న విద్యార్థుల దీక్షను పోలీసులు బలవంతంగా భగ్నం చేశారు. నిరాహార దీక్ష చేస్తున్న 7గురు విద్యార్థులలో ముగ్గురి పరిస్థితి విషమంగా ఉండటంతో పోలీసులు మంగళవారం ఉదయం బలవంతంగా ఆసుపత్రికి తరలించి వైద్యం చేయించారు. ఆసుపత్రికి తరలించిన ముగ్గురు విద్యార్థులలో శ్రీనివాస్, సైదానాయక్, మురళీలు ఉన్నారు.

కాగా ఉస్మానియా విద్యార్థులు రాత పరీక్షలు నిరసిస్తూ విశ్వవిద్యాలయంలో ర్యాలీ నిర్వహించారు. ఈ సందర్భంగా వారు ప్రభుత్వాన్ని దుయ్యబట్టారు. ప్రభుత్వం తెలంగాణ వారికి అన్యాయం చేస్తుంటే తెలంగాణకు చెందిన మంత్రులు, శాసనసభ్యులు పదవి కోసం మాట్లాడటం లేదన్నారు. సిగ్గులేని మంత్రులు వెంటనే రాజీనామా చేస్తే మేం మిమ్మలను గెలిపించుకుంటామన్నారు. ఫ్రీజోన్ విషయం తేలేవరకు పరీక్షలు నిర్వహించనివ్వమని హెచ్చరించారు. తెలంగాణకు చెందిన హోంమంత్రి సబితారెడ్డి తెలంగాణకు వ్యతిరేకంగా పనిచేస్తుందని విమర్శించారు. అంతకుముందు ఎస్ఐ అభ్యర్థులు, విద్యార్థులు హోంమంత్రి సబితారెడ్డి ఇంటిని ముట్టడించేందుకు యత్నించగా పోలీసులు అడ్డుకున్న విషయం తెలిసిందే.