వైయస్సార్ తెలంగాణ ద్రోహి కారు: వైయస్ వివేకానంద రెడ్డి

కడప: దివంగత ముఖ్యమంత్రి వైయస్ రాజశేఖరరెడ్డిని తెలంగాణ ద్రోహి అని అనటం దురదృష్టకరమని కాంగ్రెస్ పార్టీ శాసనమండలి సభ్యుడు, వైయస్ సోదరుడు వైయస్ వివేకానందరెడ్డి అన్నారు. ఎవరి ఎదుగుదలను వైయస్ రాజశేఖరరెడ్డి ప్రోత్సహించాడో వారే తనని ద్రోహీ అనడం బాధాకరమన్నారు. వైయస్ ముఖ్యమంత్రి పదవి చేపట్టినప్పటినుండి అన్ని ప్రాంతాలను సమానంగా చూశాడని, తెలంగాణను ఎంతో అభివృద్ధి చేశాడని తెలిపారు. దానిని తెలంగాణ కాంగ్రెస్ నాయకులు తెలుసుకోవాలన్నారు.

కడప పార్లమెంటు సభ్యుడు వైయస్ జగన్మోహన్ రెడ్డి చేపడుతున్న ఓదార్పు యాత్ర అతని వ్యక్తిగతమన్నారు. ఓదార్పు యాత్రను రాజకీయం చేయటం తగదన్నారు. తన తండ్రి మరణ వార్త విని మృతిచెందిన వారి కుటుంబాలను పరామర్శిస్తున్న జగన్ వల్ల కాంగ్రెస్ లాభపడుతుందే కాని ఎలాంటి నష్టం జరగదన్నారు.