వ్యక్తిగత ప్రతిష్టకుపోయి పోలవరాన్ని పక్కదారి పట్టిస్తున్నారు: వెంకయ్యనాయుడు

న్యూఢిల్లీ: కాంగ్రెసు ప్రభుత్వం పోలవరంపై రాష్ట్ర ప్రజలకు తీవ్ర అన్యాయం చేస్తోందని భారతీయ జనతా పార్టీ సీనియర్ నాయకుడు ముప్పవరపు వెంకయ్యనాయుడు బుధవారం న్యూడిల్లీలో అన్నారు. ఆంధ్రప్రదేశ్ కు చెందిన కాంగ్రెసు పార్లమెంటు సభ్యులు వ్యక్తిగత ప్రతిష్టకు పోయి పోలవరం సమస్యను పక్కదారి పట్టించే ప్రయత్నాలు చేస్తున్నారని ఆయన అన్నారు. రాష్ట్రానికి చెందిన పార్లమెంటు సభ్యులందరూ పోలవరం ప్రాజెక్టు విషయంపై కేంద్ర ప్రభుత్వంపై ఒత్తిడి తేవాలని కోరారు.

పోలవరాన్ని జాతీయ ప్రాజెక్టుగా గుర్తించాలని ఆయన కేంద్ర ప్రభుత్వాన్ని డిమాండ్ చేశారు. పోలవరం తమ అంతర్గత వ్యవహారంగా కాంగ్రెసు భావించటం వల్లే ఇంత రాద్దాంతం జరుగుతుందన్నారు. పోలవరం కాంగ్రెసు సొత్తు కాదని, ఆది యావత్ జాతికి సంబంధించినదన్నారు. ఈనెల 20వ తారీఖున భారతీయ జనతా పార్టీ రాష్టస్థాయి సదస్సును రాజమండ్రిలో నిర్వహిస్తామన్నారు.