అఫడవిట్ వేయండి: పిఎం మన్మోహన్ మౌనంపై సుప్రీంకోర్టు ఆదేశాలు

న్యూఢిల్లీ: 2జి స్పెక్ట్రమ్ స్కామ్ కేసులో మాజీ టెలికం మంత్రి ఎ రాజా ప్రాసిక్యూషన్ కు అనుమతివ్వాలనే విజ్ఞప్తిపై ప్రధాని మన్మోహన్ సింగ్ ఎందుకు మౌనం వహించారో తెలుపుతూ అఫడవిట్ దాఖలు చేయాలని సుప్రీంకోర్టు గురువారం కేంద్ర ప్రభుత్వాన్ని ఆదేశించింది. రాజా ప్రాసిక్యూషన్ కు అనుమతి ఇవ్వాలని కోరుతూ జనతా పార్టీ అధ్యక్షుడు సుబ్రమణ్య స్వామి సుప్రీంకోర్టులో పిటిషన్ దాఖలు చేశారు. శనివారంలోగా అఫిడవిట్ దాఖలు చేయాలని సుప్రీంకోర్టు కేంద్రాన్ని ఆదేశించింది. తదుపరి విచారణను మంగళవారానికి వాయిదా వేసింది.

దస్త్రాలు చూపించినంత మాత్రాన సరిపోదని, ఆలస్యానికి కారణమేమిటో చెప్తే బాధ్యతను నిర్ధారించడానికి వీలవుతుందని సుప్రీంకోర్టు చెప్పంది. 11 నెలల జాప్యానికి కారణమేమిటో వివరిస్తూ ప్రధాని తరఫున బాధ్యాతాయుతమైన అధికారి అఫడవిట్ దాఖలు చేయాలని సూచించింది. ప్రధాని 11 నెలల పాటు సుబ్రమణ్య స్వామి పిటిషన్ కు ఎందుకు స్పందించలేదని సుప్రీంకోర్టు ప్రశ్నించిన విషయం తెలిసిందే. దీనిపై ప్రధానికి మొట్టికాయలు కూడా వేసింది.