అవినీతికి కాంగ్రెసు చిరునామాగా మారింది: చంద్రబాబు ధ్వజం

విశాఖపట్నం: అవినీతికి కాంగ్రెసు చిరునామాగా మారిందని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్సించారు. విశాఖపట్నం జిల్లా పర్యటనకు వచ్చిన ఆయన గురువారం మీడియా ప్రతినిధులతో మాట్లాడారు. బ్రిటిష్ వాళ్ల కన్నా ఎక్కువగా కాంగ్రెసు వాళ్లు దేశాన్ని కొల్లగొడుతున్నారని ఆయన వ్యాఖ్యానించారు. కాంగ్రెసులో అవినీతి రోగం ముదిరిందని ఆయన అన్నారు. కాంగ్రెసు ఆదర్సమని ముఖ్యమంత్రి కె. రోశయ్య చేసిన వ్యాఖ్యపై ఆయన మండిపడ్డారు. కాంగ్రెసు దేనిలో ఆదర్శమని ఆయన అడిగారు. అవినీతిపై దేశవ్యాప్తంగా చర్చ జరగాలని డిమాండ్‌ చేశారు. కాంగ్రెసు అవినీతిపై దేశస్థాయిలో పోరాటం చేస్తామని ఆయన చెప్పారు.

జి స్పెక్ట్రమ్ కుంభకోణంపై ప్రధాని డాక్టర్ మన్మోహన్ సింగ్ ను సుప్రీంకోర్టు తప్పు పట్టడాన్ని ఆయన ప్రస్తావించారు. ప్రధాని ఆ కుంభకోణంపై ఇంత కాలం ఎందుకు మౌనం వహించారని ఆయన అడిగారు. అవినీతిపరులను ప్రధాని ప్రమోట్ చేస్తున్నారని ఆయన వ్యాఖ్యానించారు. ఇంతకు ముందు ఏ ప్రధానిపై కూడా చేయని వ్యాఖ్యలు సుప్రీంకోర్టు ప్రస్తుత ప్రధాని మన్మోహన్ సింగ్ పై చేసిందని ఆయన అన్నారు. కాంగ్రెసు తప్ప దేశానికి గతి లేదని అంటున్న వ్యాఖ్యలను ఆయన ఎద్దేవా చేశారు. కాంగ్రెసు అధ్యక్షురాలు సోనియా గాంధీ తీరును కూడా ఆయన తప్పు పట్టారు.